ఖలిస్థాన్ ఉగ్రవాదంపై కెనడా సంచలన అంగీకారం

ఖలిస్థానీ ఉగ్రవాద సంస్థలకు తమ దేశం సురక్షిత స్థావరంగా మారిందన్న ఆరోపణలను కెనడా ప్రభుత్వం తొలిసారి అధికారికంగా అంగీకరించింది. కెనడా గడ్డపై నుంచి ఖలిస్థానీ వేర్పాటువాద సంస్థలు పనిచేస్తున్నాయని, వాటికి భారీగా నిధులు కూడా సమకూరుతున్నాయని సంచలన విషయాలను వెల్లడించింది. దేశంలో మనీలాండరింగ్, ఉగ్రవాద నిధుల సమీకరణ ముప్పుపై కెనడా ఆర్థిక శాఖ తాజాగా విడుదల చేసిన నివేదికలో ఈ కీలక విషయాలను పేర్కొంది.

బబ్బర్ ఖల్సా ఇంటర్నేషనల్, ఇంటర్నేషనల్ సిఖ్ యూత్ ఫెడరేషన్, సిఖ్స్ ఫర్ జస్టిస్ వంటి ఖలిస్థానీ ఉగ్రవాద గ్రూపులు కెనడాలో చురుగ్గా ఉన్నాయని ఈ నివేదిక స్పష్టం చేసింది. "కెనడాతో పాటు పలు ఇతర దేశాల్లోనూ ఈ గ్రూపులు నిధులు సేకరిస్తున్నట్లు అనుమానాలున్నాయి" అని నివేదికలో పేర్కొన్నారు. భారత్‌కు వ్యతిరేకంగా కార్యకలాపాలు సాగిస్తున్న ఈ సంస్థలకు కెనడా నుంచి నిధులు అందుతున్నాయన్న భారత్ వాదనకు ఈ నివేదిక బలం చేకూర్చినట్టయింది.

ఈ ఉగ్రవాద సంస్థలు నిధుల సమీకరణకు అనేక మార్గాలను అనుసరిస్తున్నాయని నివేదిక వివరించింది. స్వచ్ఛంద సంస్థలు, లాభాపేక్ష లేని సంస్థల ముసుగులో విరాళాలు సేకరించడం, డ్రగ్స్ అక్రమ రవాణా, వాహనాల దొంగతనాలు వంటి నేరాలకు పాల్పడటం ద్వారా నిధులు సమకూర్చుకుంటున్నాయని తెలిపింది. అంతేకాకుండా, క్రౌడ్ ఫండింగ్, క్రిప్టోకరెన్సీల వంటి ఆధునిక పద్ధతులను కూడా వాడుకుంటున్నట్లు నివేదికలో వెల్లడించారు.

ఖలిస్థానీ సంస్థలతో పాటు హమాస్, హిజ్బుల్లా వంటి అంతర్జాతీయ ఉగ్రవాద సంస్థలకు కూడా కెనడా నుంచి ఆర్థిక మద్దతు అందుతోందని నివేదిక పేర్కొనడం గమనార్హం. గతంలో కెనడాలో ఈ సంస్థలకు బలమైన నెట్‌వర్క్‌లు ఉండేవని, ప్రస్తుతం చిన్నచిన్న బృందాలుగా విడిపోయి పనిచేస్తున్నాయని తెలిపింది.