రూ.100కే మహిళల వరల్డ్ కప్ మ్యాచ్ టికెట్ .. ప్రారంభోత్సవంలో శ్రేయా ఘోషల్ సందడి

క్రికెట్ అభిమానులకు అంతర్జాతీయ క్రికెట్ మండలి (ఐసీసీ) ఒకేసారి రెండు శుభవార్తలు అందించింది. సుదీర్ఘ విరామం తర్వాత భారత్‌లో జరగనున్న మహిళల ప్రపంచకప్‌ ప్రారంభోత్సవంలో ప్రముఖ గాయని శ్రేయా ఘోషల్ తన గానంతో అలరించనున్నారు. అంతేకాకుండా, అభిమానులు పెద్ద సంఖ్యలో స్టేడియాలకు తరలివచ్చేలా మ్యాచ్ టికెట్ల ధరలను రికార్డు స్థాయిలో తగ్గించింది.

సెప్టెంబర్ 30న గౌహతిలో భారత్, శ్రీలంక జట్ల మధ్య జరిగే తొలి మ్యాచ్‌కు ముందు ఈ ప్రారంభ వేడుకలు జరగనున్నాయి. ఈ వేడుకల్లో భాగంగా ఈ టోర్నమెంట్ కోసం రూపొందించిన అధికారిక గీతం 'బ్రింగ్ ఇట్ హోమ్'ను శ్రేయా ఘోషల్ స్వయంగా ఆలపించనున్నారు. మహిళల క్రికెట్‌లోని స్ఫూర్తిని, ఐక్యతను చాటిచెప్పేలా ఈ ప్రదర్శన ఉంటుందని ఐసీసీ పేర్కొంది.

మరోవైపు, మహిళల క్రికెట్‌కు ఆదరణ పెంచే లక్ష్యంతో ఐసీసీ చారిత్రాత్మక నిర్ణయం తీసుకుంది. టోర్నమెంట్‌లోని అన్ని లీగ్ మ్యాచ్‌లకు మొదటి దశలో టికెట్ ధరను రూ.100 గా నిర్ణయించింది. ఇది ఏ ఐసీసీ ఈవెంట్‌లోనైనా అత్యంత తక్కువ ధర కావడం విశేషం. ఈ నిర్ణయంతో స్టేడియాలు అభిమానులతో నిండిపోతాయని ఐసీసీ ఆశాభావం వ్యక్తం చేసింది.

టికెట్ల విక్రయాల కోసం ఐసీసీ గూగుల్ పేతో జతకట్టింది. మొదటి దశలో అన్ని లీగ్ మ్యాచ్‌ల టికెట్లు ప్రత్యేకంగా గూగుల్ పే యూజర్లకు మాత్రమే అందుబాటులో ఉంటాయి. ఇక రెండో దశ టికెట్ల అమ్మకాలు సెప్టెంబర్ 9 నుంచి ప్రారంభమవుతాయి. కాగా, 12 సంవత్సరాల తర్వాత భారత్ మహిళల ప్రపంచకప్‌కు ఆతిథ్యం ఇస్తుండగా, ఈ మెగా టోర్నీలో మొత్తం ఎనిమిది జట్లు టైటిల్ కోసం పోటీపడనున్నాయి.