ఏపీలో మందుబాబులకు గుడ్ న్యూస్

ఆంధ్రప్రదేశ్‌లో మద్యం ప్రియులకు రాష్ట్ర ప్రభుత్వం శుభవార్త అందించింది. రాష్ట్రవ్యాప్తంగా బార్ల నిర్వహణ వేళలను పొడిగిస్తూ కొత్త విధానాన్ని అమల్లోకి తెచ్చింది. దీని ప్రకారం, ఇకపై బార్లు ఉదయం 10 గంటల నుంచి అర్ధరాత్రి 12 గంటల వరకు తెరిచి ఉంటాయి. ఈ మేరకు నూతన బార్ పాలసీకి ఆమోదం తెలుపుతూ ప్రభుత్వం ఉత్తర్వులు జారీ చేసింది.

వివరాల్లోకి వెళితే, ఇప్పటివరకు రాష్ట్రంలో బార్లు ఉదయం 11 గంటల నుంచి రాత్రి 11 గంటల వరకు మాత్రమే పనిచేసేవి. అయితే, నూతన పాలసీ ప్రకారం, బార్లు తెరిచే సమయాన్ని గంట ముందుగా ఉదయం 10 గంటలకు మార్చగా, మూసివేసే సమయాన్ని మరో గంట పాటు అర్ధరాత్రి 12 గంటల వరకు పొడిగించారు. ఈ మార్పుల వల్ల బార్ల నిర్వహణ సమయం రోజుకు రెండు గంటలు పెరిగింది.

ఈ కొత్త బార్ పాలసీ సెప్టెంబర్ 1వ తేదీ నుంచే అమల్లోకి వచ్చినట్లు ప్రొహిబిషన్ అండ్ ఎక్సైజ్ శాఖ డైరెక్టర్ నిశాంత్ కుమార్ అధికారిక ఉత్తర్వుల్లో స్పష్టం చేశారు. ఈ నూతన విధానం రాబోయే మూడేళ్ల పాటు, అంటే 2028 వరకు అమలులో ఉంటుందని ఆయన తెలిపారు. కాగా, ఈ కొత్త విధానంలో భాగంగా రాష్ట్రంలోని మద్యం దుకాణాల్లో 10 శాతాన్ని కల్లు గీత కులాలకు చెందిన వారికి కేటాయించాలని ప్రభుత్వం నిర్ణయించిన విషయం తెలిసిందే.