తన తల్లి శ్రీదేవి సూపర్ హిట్ సినిమా రీమేక్ లో జాన్వీ కపూర్!

అతిలోక సుందరి శ్రీదేవి కెరీర్‌లోని మరపురాని చిత్రాల్లో 'చాల్‌బాజ్‌' ఒకటి. 1989లో వచ్చిన ఈ సినిమాలో ఆమె ద్విపాత్రాభినయం ప్రేక్షకులను విశేషంగా ఆకట్టుకుంది. ఇప్పుడు ఇదే క్లాసిక్ సినిమా రీమేక్‌లో శ్రీదేవి కుమార్తె, యువ కథానాయిక జాన్వీ కపూర్ నటించనున్నారనే వార్త బాలీవుడ్‌లో హాట్‌టాపిక్‌గా మారింది. తన తల్లి పోషించిన ఐకానిక్ పాత్రను పోషించేందుకు జాన్వీ సిద్ధమవుతున్నట్లు తెలుస్తోంది.

తన తల్లి శ్రీదేవి నటించిన చిత్రాలంటే తనకు ఎంతో ఇష్టమని, అవి తనకో ఎమోషన్ అని జాన్వీ పలు సందర్భాల్లో చెప్పారు. ఈ క్రమంలో, ఆమెకు బాగా నచ్చిన సినిమాల్లో ఒకటైన 'చాల్‌బాజ్‌' రీమేక్‌లో నటించే అవకాశాన్ని ఒక సవాలుగా తీసుకున్నారని బాలీవుడ్ మీడియా వర్గాలు పేర్కొంటున్నాయి. ఈ పాత్ర కోసం జాన్వీ ఇప్పటికే ప్రత్యేకంగా గ్రౌండ్ వర్క్ కూడా మొదలుపెట్టారని సమాచారం. ఓ ప్రముఖ బాలీవుడ్ నిర్మాత ఈ ప్రాజెక్టును నిర్మించనున్నారని, దీనికి సంబంధించిన అధికారిక ప్రకటన ఈ సెప్టెంబర్ నెలాఖరులో వెలువడే అవకాశం ఉందని తెలుస్తోంది.

గతంలో కూడా 'చాల్‌బాజ్‌' చిత్రాన్ని 'చాల్‌బాజ్‌ ఇన్ లండన్‌' పేరుతో రీమేక్ చేసేందుకు ప్రయత్నాలు జరిగాయి. శ్రద్ధా కపూర్‌ను ప్రధాన పాత్రధారిగా ప్రకటిస్తూ పోస్టర్లు కూడా విడుదల చేశారు. అయితే, కొన్ని కారణాల వల్ల ఆ ప్రాజెక్ట్ ముందుకు సాగలేదు. ఇప్పుడు జాన్వీ పేరు తెరపైకి రావడంతో ఈ రీమేక్‌పై మళ్లీ ఆసక్తి పెరిగింది. ఒరిజినల్ సినిమాలో శ్రీదేవి రెండు విభిన్నమైన పాత్రల్లో అద్భుతంగా నటించారు. మరి రీమేక్‌లో జాన్వీ కూడా ద్విపాత్రాభినయం చేస్తారా? లేక కథలో ఏమైనా మార్పులు ఉంటాయా? అనేది వేచి చూడాలి.

ప్రస్తుతం జాన్వీ కపూర్ వరుస సినిమాలతో బిజీగా ఉన్నారు. ఇటీవల ‘పరమ్‌ సుందరి’ చిత్రంతో ప్రేక్షకులను పలకరించిన ఆమె, త్వరలో 'సన్నీ సంస్కారి కీ తులసి కుమారి' సినిమాతో అక్టోబర్ 2న ప్రేక్షకుల ముందుకు రానున్నారు. దీంతో పాటు తెలుగులో రామ్ చరణ్ సరసన 'పెద్ది' చిత్రంలో కూడా నటిస్తున్నారు.