Venkatesh: పెంపుడు కుక్క 'గూగుల్' మృతి... తీవ్ర విచారంలో వెంకటేశ్ కుటుంబం

ప్రముఖ సినీ నటుడు విక్టరీ వెంకటేశ్ తీవ్ర దుఃఖంలో మునిగిపోయారు. తన కుటుంబ సభ్యుడిగా భావించే ప్రియమైన పెంపుడు శునకం మరణించడంతో ఆయన తీవ్ర వేదనకు గురయ్యారు. ఈ విషయాన్ని సోషల్ మీడియా ద్వారా పంచుకుంటూ భావోద్వేగభరితమైన పోస్ట్ పెట్టారు. తన పెంపుడు కుక్క ‘గూగుల్’తో ఉన్న అనుబంధాన్ని గుర్తుచేసుకుంటూ ఆయన పెట్టిన ఈ పోస్ట్ అందరినీ కదిలిస్తోంది.

గత 12 సంవత్సరాలుగా తమతోనే ఉన్న ‘గూగుల్’ తమ జీవితాల్లో షరతులు లేని ప్రేమను, అందమైన జ్ఞాపకాలను నింపిందని వెంకటేశ్ తెలిపారు. "నా ప్రియమైన గూగుల్.. నువ్వే మా జీవితాల్లో వెలుగులు నింపావు. ఈ రోజు నీకు వీడ్కోలు పలికాం. నువ్వు లేని లోటు మాటల్లో చెప్పలేనిది. నా ప్రియ నేస్తమా.. నిన్ను ఎప్పటికీ మిస్ అవుతాను" అంటూ తన బాధను వ్యక్తం చేశారు.

వెంకటేశ్‌కు జంతువులంటే, ముఖ్యంగా శునకాలంటే ఎంతో ప్రేమ. తన పెంపుడు శునకాన్ని కేవలం పెంపుడు జంతువుగా కాకుండా, కుటుంబంలో ఒకరిగా చూసుకున్నారు. అలాంటి ఆత్మీయ నేస్తం దూరమవ్వడంతో ఆయన తీవ్రంగా కలత చెందారు. వెంకటేశ్ పెట్టిన ఈ పోస్ట్ చూసిన ఆయన అభిమానులు, నెటిజన్లు స్పందిస్తూ.. ఆయనకు ధైర్యం చెబుతున్నారు.