కుటుంబంతో కలిసి సల్మాన్ ఖాన్ వినాయక చవితి వేడుకలు.. వీడియో వైరల్

బాలీవుడ్ స్టార్ హీరో సల్మాన్ ఖాన్ తన కుటుంబ సభ్యులతో కలిసి వినాయక చవితి వేడుకలను భక్తిశ్రద్ధలతో జరుపుకున్నారు. తన సోదరి అర్పిత ఖాన్ శర్మ ముంబైలోని నివాసంలో జరిగిన ఈ వేడుకలకు సంబంధించిన ఒక వీడియోను ఆయన బుధవారం రాత్రి ఇన్‌స్టాగ్రామ్‌లో పంచుకున్నారు. ప్రస్తుతం ఈ వీడియో సోషల్ మీడియాలో వైరల్‌గా మారింది.

ఈ వీడియోలో సల్మాన్ తల్లి సల్మా ఖాన్, తండ్రి సలీం ఖాన్ మొదటగా గణపతికి హారతి ఇస్తూ కనిపించారు. వారి తర్వాత సల్మాన్ ఖాన్ స్వయంగా హారతి ఇచ్చి తన భక్తిని చాటుకున్నారు. వీరితో పాటు సోదరుడు అర్బాజ్ ఖాన్, సోదరి అల్విరా ఖాన్, ఆమె భర్త అతుల్ అగ్నిహోత్రి, వారి కుమార్తె అలిజె కూడా పూజలో పాల్గొన్నారు.

అర్పిత ఖాన్, ఆమె భర్త ఆయుష్ శర్మ తమ పిల్లలు అహిల్, ఆయత్‍లతో కలిసి ఈ సంబరాల్లో సందడి చేశారు. ఖాన్ కుటుంబానికి అత్యంత సన్నిహితులైన నటులు రితేశ్‌ దేశ్‌ముఖ్, జెనీలియా దంపతులు కూడా తమ ఇద్దరు కుమారులతో ఈ వేడుకలకు హాజరై ప్రత్యేక ఆకర్షణగా నిలిచారు. 

ఇక సల్మాన్ ఖాన్ సినిమాల విషయానికొస్తే, ఆయన చివరిగా ఏఆర్ మురుగదాస్ దర్శకత్వంలో వచ్చిన 'సికందర్' చిత్రంలో కనిపించారు. త్వరలో అపూర్వ లఖియా దర్శకత్వంలో 'బ్యాటిల్ ఆఫ్ గల్వాన్' చిత్రంలో భారత సైనికుడి పాత్రలో క‌నిపించనున్నారు. ప్రస్తుతం ఆయన ప్రముఖ రియాలిటీ షో 'బిగ్ బాస్ 19'కి హోస్ట్‌గా వ్యవహరిస్తున్నారు.