విడాకుల ఊహాగానాలకు తెర... కలిసి దర్శనమిచ్చిన గోవిందా, సునీత దంపతులు

బాలీవుడ్ సీనియర్ నటుడు గోవిందా, ఆయన భార్య సునీత అహుజా విడాకులు తీసుకోబోతున్నారంటూ కొద్ది రోజులుగా సోషల్ మీడియాలో జరుగుతున్న ప్రచారానికి తెరపడింది. వినాయక చవితి పర్వదినం సందర్భంగా ఈ జంట కలిసి మీడియాకు కనిపించి అన్ని వదంతులకు ముగింపు పలికింది.

ముంబైలోని తమ నివాసంలో గణపతిని ప్రతిష్టించిన సందర్భంగా గోవింద, సునీత ఇద్దరూ ఒకే రంగు (ఎరుపు) దుస్తులు ధరించి ప్రత్యేక పూజలు నిర్వహించారు. అనంతరం బయటకు వచ్చి ఫోటోగ్రాఫర్లకు నవ్వుతూ ఫోజులిచ్చారు. దీంతో వారిద్దరూ విడిపోతున్నారన్న వార్తల్లో ఎలాంటి నిజం లేదని స్పష్టమైంది.

ఇటీవల గోవింద దంపతుల మధ్య మనస్పర్థలు వచ్చాయని, సునీత 2024లో కోర్టులో విడాకుల కోసం పత్రాలు కూడా దాఖలు చేశారని వార్తలు ముమ్మరంగా వ్యాపించాయి. ఈ నేపథ్యంలో గోవింద మేనేజర్ శశి సిన్హా ఐఏఎన్ఎస్ వార్తా సంస్థతో మాట్లాడుతూ ఈ విషయంపై పూర్తి స్పష్టత ఇచ్చారు. "ప్రస్తుతం జరుగుతున్న ప్రచారంలో నిజం లేదు. ఎవరో కావాలనే ఈ దుష్ప్రచారం చేస్తున్నారు. ఇది చాలా పాత విషయం" అని ఆయన తెలిపారు.

"కొన్ని నెలల క్రితం సునీత కోర్టులో కేసు వేసిన మాట వాస్తవమే. కానీ, ఆ సమస్య ప్రాథమిక దశలోనే పరిష్కారమైంది. ఇప్పుడు వారిద్దరి మధ్య అంతా సవ్యంగా ఉంది. పాత వార్తలను మళ్లీ ఇప్పుడు తెరపైకి తెచ్చి కొందరు లబ్ధి పొందాలని చూస్తున్నారు. ఈ వివాదంపై గోవింద ఎప్పుడూ మాట్లాడలేదు. త్వరలోనే అంతా మంచే జరుగుతుంది" అని శశి సిన్హా వివరించారు. గోవింద దంపతులు తాజాగా కలిసి కనిపించడంతో ఈ వివాదం పూర్తిగా సద్దుమణిగినట్లయింది.