యువతకు ఫ్లిప్‌కార్ట్ శుభవార్త.. పండగ సీజన్‌లో 2.2 లక్షల కొత్త ఉద్యోగాలు

రాబోయే పండగల సీజన్‌ను దృష్టిలో ఉంచుకుని ప్రముఖ ఈ-కామర్స్ సంస్థ ఫ్లిప్‌కార్ట్ భారీగా ఉద్యోగ అవకాశాలను ప్రకటించింది. తన వార్షిక మెగా సేల్ 'ది బిగ్ బిలియన్ డేస్' కోసం సన్నాహాల్లో భాగంగా దేశవ్యాప్తంగా 2.2 లక్షలకు పైగా తాత్కాలిక (సీజనల్) ఉద్యోగాలను సృష్టించనున్నట్లు సోమవారం ఒక ప్రకటనలో వెల్లడించింది. ముఖ్యంగా టైర్-2, టైర్-3 నగరాల్లోని యువతకు ఉపాధి కల్పించడంపై ప్రత్యేకంగా దృష్టి సారించినట్లు పేర్కొంది.

ఈ నియామకాలు ప్రధానంగా సప్లై చైన్, లాజిస్టిక్స్, లాస్ట్-మైల్ డెలివరీ వంటి విభాగాల్లో ఉంటాయని ఫ్లిప్‌కార్ట్ తెలిపింది. ప్యాకర్లు, పిక్కర్లు, సార్టర్లు, డెలివరీ ఎగ్జిక్యూటివ్‌ల కోసం నియామకాలు జరగనున్నాయి. ఈసారి నియామక ప్రక్రియలో సమ్మిళిత వృద్ధికి పెద్దపీట వేస్తున్నట్లు కంపెనీ స్పష్టం చేసింది. మొత్తం నియామకాల్లో 15 శాతం మంది మొదటిసారి ఉద్యోగంలో చేరుతున్నవారేనని, గతేడాదితో పోలిస్తే మహిళలు, వికలాంగులు (పీడబ్ల్యూడీ), ఎల్జీబీటీక్యూఐఏ వర్గాల వారికి అధికంగా అవకాశాలు కల్పిస్తున్నట్లు వివరించింది.

ఈ సందర్భంగా ఫ్లిప్‌కార్ట్ సీహెచ్‌ఆర్ఓ సీమా నాయర్ మాట్లాడుతూ, "ది బిగ్ బిలియన్ డేస్ అనేది మాకు వేగం, పురోగతికి సంబంధించిన ఒక వేడుక. ఈసారి పండగ సీజన్‌కు ముందు మా సామర్థ్యాలను మరింత బలోపేతం చేసుకున్నాం. టెక్నాలజీ, సుస్థిర పద్ధతులలో మరిన్ని ఉద్యోగాలు సృష్టిస్తూ అందరికీ అవకాశాలు కల్పించడంపై దృష్టి పెట్టాం" అని తెలిపారు.

ఉద్యోగ కల్పనతో పాటు, ఫ్లిప్‌కార్ట్ తన లాజిస్టిక్స్ నెట్‌వర్క్‌ను కూడా భారీగా విస్తరిస్తోంది. దేశవ్యాప్తంగా 28 రాష్ట్రాల్లోని టైర్-2, టైర్-3 నగరాలైన సిలిగురి, కుండ్లి, జాఖర్ వంటి ప్రాంతాల్లో పండగ సీజన్ కోసం ప్రత్యేకంగా 650 కొత్త డెలివరీ హబ్‌లను ఏర్పాటు చేస్తున్నట్లు ప్రకటించింది. అంతేకాకుండా, తన ‘సప్లై చైన్ ఆపరేషన్స్ అకాడమీ (ఎస్సీఓఏ)’ ద్వారా ఇప్పటికే వేలాది మందికి శిక్షణ ఇచ్చామని, 2025 చివరి నాటికి మరో 10,000 మందికి నైపుణ్య శిక్షణ ఇవ్వాలని లక్ష్యంగా పెట్టుకున్నట్లు కంపెనీ పేర్కొంది.