పవన్ కల్యాణ్ 'ఓజీ' నుంచి రెండో పాట వచ్చేది అప్పుడే!

పవర్ స్టార్ పవన్ కల్యాణ్ కథానాయకుడిగా, యువ దర్శకుడు సుజీత్ దర్శకత్వంలో తెరకెక్కుతున్న భారీ యాక్షన్ చిత్రం 'ఓజీ' (ఒరిజినల్ గ్యాంగ్‌స్టర్) నుంచి మరో కీలక అప్‌డేట్ వచ్చింది. ఈ సినిమాకు సంబంధించి రెండో పాట విడుదల తేదీని చిత్ర బృందం అధికారికంగా ప్రకటించింది. 'సువ్వి సువ్వి' పేరుతో రానున్న ఈ పాటను ఆగస్టు 27వ తేదీన ఉదయం 10:08 గంటలకు విడుదల చేయనున్నట్లు మేకర్స్ తెలిపారు. ఈ మేరకు డీవీవీ మూవీస్ సోషల్ మీడియాలో ఓ ప్రత్యేక పోస్టర్‌ను పంచుకుంది.

"తుపాను తర్వాత ప్రశాంతత వస్తుంది" అనే ఆసక్తికర క్యాప్షన్‌తో ఈ ప్రకటన చేయడంతో పాట ఎలా ఉండబోతుందనే దానిపై అంచనాలు పెరిగాయి. సినిమా టైటిల్, ఫస్ట్ గ్లింప్స్ అన్నీ యాక్షన్‌తో నిండి ఉండగా, రెండో పాట మాత్రం పూర్తి భిన్నంగా మెలోడీ ప్రధానంగా ఉండబోతోందని ఈ క్యాప్షన్ ద్వారా చిత్ర యూనిట్ హింట్ ఇచ్చింది. 'సువ్వి సువ్వి' అనే టైటిల్ కూడా ఇది ఒక ఫ్యామిలీ లేదా మెలోడీ సాంగ్ అయ్యుండొచ్చనే అంచనాలను బలపరుస్తోంది. సంగీత దర్శకుడు ఎస్.ఎస్. తమన్ ఈ గ్యాంగ్‌స్టర్ కథకు ఎలాంటి సంగీతం అందించారోనని అభిమానులు ఆసక్తిగా ఎదురుచూస్తున్నారు.

ఈ చిత్రంలో పవన్ కళ్యాణ్ సరసన ప్రియాంక అరుళ్ మోహన్ హీరోయిన్‌గా నటిస్తుండగా, బాలీవుడ్ నటుడు ఇమ్రాన్ హష్మీ కీలక పాత్రలో కనిపించనున్నారు. డీవీవీ ఎంటర్‌టైన్‌మెంట్స్ పతాకంపై డీవీవీ దానయ్య ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. సెప్టెంబర్ 25న ప్రపంచవ్యాప్తంగా ఈ సినిమా ప్రేక్షకుల ముందుకు రానుంది. తాజా పాట ప్రకటనతో సినిమాపై ఉన్న అంచనాలు మరింత పెరిగాయి.