నటుడిగా ఆరంగేట్రం చేసిన మోదీ మాజీ బాడీగార్డ్

 ప్రధాని నరేంద్ర మోదీకి ఒకప్పుడు భద్రతా అధికారిగా పనిచేసిన వ్యక్తి ఇప్పుడు నటుడిగా కొత్త అవతారం ఎత్తారు. భారత సైన్యంలో స్పై, స్నైపర్, నేషనల్ సెక్యూరిటీ గార్డ్ (ఎన్‌ఎస్‌జీ) కమాండోగా దేశానికి విశేష సేవలందించిన ఉత్తరాఖండ్‌కు చెందిన లక్కీ బిష్ట్, తాజాగా వెండితెరపై అడుగుపెట్టారు. ప్రస్తుతం ఎంఎక్స్ ప్లేయర్‌లో ప్రసారమవుతున్న "సేన - గార్డియన్స్ ఆఫ్ ది నేషన్" అనే వెబ్ సిరీస్‌లో ఆయన అతిథి పాత్రలో కనిపించారు.

ఈ వెబ్ సిరీస్‌కు అభినవ్ ఆనంద్ దర్శకత్వం వహించగా, విక్రమ్ సింగ్ చౌహాన్ ప్రధాన పాత్ర పోషించారు. యశ్‌పాల్ శర్మ, షిర్లే సేథియా వంటి నటులు ఇతర కీలక పాత్రల్లో నటించారు. అమెరికాలో ఉద్యోగాన్ని వదిలి భారత సైన్యంలో చేరిన కార్తీక్ అనే యువకుడు, ఉగ్రవాదులను ఎలా ఎదుర్కొన్నాడనే కథాంశంతో ఈ సిరీస్ తెరకెక్కింది.

ఈ సందర్భంగా లక్కీ బిష్ట్ మీడియాతో మాట్లాడుతూ, "నిజమైన సైనికుడిని తెరపై ఆవిష్కరించాలన్న ఆలోచనతోనే తనకు ఈ పాత్ర దక్కింది. సైనిక నేపథ్యం, శిక్షణలో పొందిన అనుభవాలు నటనకు ఎంతగానో ఉపయోగపడ్డాయి. నటన నాకు కొత్త రంగమే అయినా, ఒక సైనికుడిగా నటించడం అంటే నా నిజ జీవితంలోని భావోద్వేగాలను కెమెరా ముందు చూపించడమే" అని ఆయన వివరించారు.

లక్కీ బిష్ట్ తన కెరీర్‌లో ఎన్నో కీలక బాధ్యతలు నిర్వర్తించారు. నరేంద్ర మోదీ గుజరాత్ ముఖ్యమంత్రిగా ఉన్న సమయంలో ఆయనకు సెక్యూరిటీ ఆఫీసర్‌గా పనిచేశారు. అంతేకాకుండా, ఎల్‌కే అడ్వాణీ, రాజ్‌నాథ్ సింగ్, అస్సాం మాజీ సీఎం తరుణ్ గొగాయ్ వంటి ప్రముఖులకు బాడీగార్డ్‌గా ఉన్నారు. 2010లో అమెరికా మాజీ అధ్యక్షుడు బరాక్ ఒబామా భారత పర్యటనకు వచ్చినప్పుడు భద్రత కల్పించిన బృందంలో కూడా ఆయన సభ్యుడిగా ఉన్నారు. భారత సైన్యం, 'రా', ఎన్‌ఎస్‌జీ, అస్సాం రైఫిల్స్ వంటి ప్రతిష్టాత్మక విభాగాల్లో పనిచేసి పలు కీలక ఆపరేషన్లలో పాలుపంచుకున్నారు.