ముఖ్యమంత్రిపై దాడి ఎఫెక్ట్: ఢిల్లీ కొత్త పోలీస్ కమిషనర్‌గా సతీశ్ గోల్చా

ఢిల్లీ ముఖ్యమంత్రి రేఖా గుప్తాపై దాడి జరిగిన 24 గంటల్లోనే కేంద్ర ప్రభుత్వం కీలక నిర్ణయం తీసుకుంది. ఢిల్లీ పోలీస్ విభాగానికి కొత్త అధిపతిని నియమిస్తూ గురువారం ఉత్తర్వులు జారీ చేసింది. సీనియర్ ఐపీఎస్ అధికారి సతీశ్ గోల్చాను ఢిల్లీ నూతన పోలీస్ కమిషనర్‌గా నియమిస్తూ కేంద్ర హోం మంత్రిత్వ శాఖ ప్రకటించింది.

ప్రస్తుతం ఢిల్లీ జైళ్ల శాఖ డైరెక్టర్ జనరల్‌గా సేవలు అందిస్తున్న సతీశ్ గోల్చా 1992 బ్యాచ్‌కు చెందిన ఐపీఎస్ అధికారి. ఆయన నియామకానికి సంబంధించిన ఉత్తర్వులను హోం మంత్రిత్వ శాఖ నేడు (ఆగస్టు 21) విడుదల చేసింది. "సమర్థ అధికారి ఆమోదంతో సతీశ్ గోల్చాను ఢిల్లీ పోలీస్ కమిషనర్ పదవిలో నియమించడం జరిగింది. ఆయన బాధ్యతలు స్వీకరించిన నాటి నుంచి తదుపరి ఉత్తర్వులు వెలువడే వరకు ఈ పదవిలో కొనసాగుతారు" అని ఆ ఉత్తర్వుల్లో పేర్కొన్నారు.

ఆగస్టు 1న తాత్కాలిక కమిషనర్‌గా బాధ్యతలు చేపట్టిన ఎస్‌బీకే సింగ్ స్థానంలో గోల్చా నియమితులయ్యారు. కాగా, బుధవారం సివిల్ లైన్స్‌లోని తన అధికారిక నివాసంలో ప్రజా వినతుల స్వీకరణ కార్యక్రమంలో పాల్గొన్న ముఖ్యమంత్రి రేఖా గుప్తాపై దాడి జరిగిన విషయం తెలిసిందే.