ప్రమాదంలో రింకూసింగ్ కెరియర్.. ఆసియాకప్‌లో చోటు గల్లంతు?

ఒకప్పుడు భారత క్రికెట్ జట్టుకు నెక్స్ట్ గ్రేట్ ఫినిషర్ అంటూ ప్రశంసలు అందుకున్న యువ సంచలనం రింకూ సింగ్ కెరియర్ ఇప్పుడు ప్రమాదంలో పడింది. 2023 ఐపీఎల్‌లో కోల్‌కతా నైట్ రైడర్స్ తరఫున 574 పరుగులతో సత్తా చాటి, అన్‌స్టాపబుల్‌గా కనిపించిన ఈ ఉత్తరప్రదేశ్ ఆటగాడు ఇప్పుడు ఫామ్ కోల్పోయి తీవ్రంగా ఇబ్బంది పడుతున్నాడు. ఆకాశమంత ఎత్తుకు ఎదుగుతాడనుకున్న రింకూ, అనూహ్యంగా కిందకు పడిపోవడంతో రాబోయే ఆసియా కప్‌కు అతని ఎంపికపై నీలినీడలు కమ్ముకున్నాయి.

రింకూ సింగ్ అంతర్జాతీయ టీ20 కెరీర్‌ను రెండు భాగాలుగా చూడవచ్చు. గత ఏడాది బంగ్లాదేశ్ సిరీస్ వరకు అతడు ఆడిన 19 ఇన్నింగ్స్‌లలో 59.87 సగటు, 175.45 స్ట్రైక్ రేట్‌తో 479 పరుగులు చేశాడు. ఇందులో మూడు అర్ధ శతకాలు కూడా ఉన్నాయి. అయితే, ఆ తర్వాత అతడి ప్రదర్శన గ్రాఫ్ ఒక్కసారిగా పడిపోయింది. దక్షిణాఫ్రికా, ఇంగ్లండ్‌తో జరిగిన గత రెండు సిరీస్‌లలో కలిపి 7 మ్యాచ్‌లు ఆడిన రింకూ కేవలం 13.40 సగటుతో 67 పరుగులు మాత్రమే చేయగలిగాడు. అతడి స్ట్రైక్ రేట్ కూడా 101.51కి పడిపోవడం ఆందోళన కలిగించే విషయం.

ఐపీఎల్‌లోనూ అదే కథ
అంతర్జాతీయ క్రికెట్‌లోనే కాకుండా ఐపీఎల్‌లోనూ రింకూ మెరుపులు మాయమయ్యాయి. 2023లో అద్భుతంగా రాణించిన రింకూసింగ్ 2024 సీజన్‌లో 18.66 సగటుతో 168 పరుగులు, 2025 సీజన్‌లో 29.42 సగటుతో 206 పరుగులు మాత్రమే చేసి నిరాశపరిచాడు. గత 28 ఐపీఎల్ మ్యాచ్‌లలో రింకూ ఒక్క అర్ధ శతకం కూడా చేయలేకపోవడం అతని ఫామ్‌కు అద్దం పడుతోంది.

విశ్లేషకుల అభిప్రాయం ప్రకారం, ఐపీఎల్‌లో అతడి బ్యాటింగ్ స్థానం తరచూ మారడమే ఈ వైఫల్యాలకు ప్రధాన కారణంగా కనిపిస్తోంది. చాలా మ్యాచ్‌లలో అతడిని 6,7, లేదా 8వ స్థానంలో బ్యాటింగ్‌కు పంపడంతో, క్రీజులో కుదురుకునేందుకు తగిన సమయం దొరకలేదు. 2025 ఐపీఎల్‌లో అతడు 20 బంతులకు పైగా ఆడిన ఒక మ్యాచ్‌లో 144 స్ట్రైక్ రేట్‌తో 36 పరుగులు చేశాడు. 

కానీ, ఆ తర్వాత మళ్లీ అతడిని కింది వరుసలో పంపడంతో ఆత్మవిశ్వాసం దెబ్బతింది. ఒకప్పుడు జట్టులో తన స్థానాన్ని సుస్థిరం చేసుకుంటాడని భావించిన రింకూ సింగ్, ఇప్పుడు జట్టులో చోటు కోసమే పోరాడాల్సిన పరిస్థితికి చేరుకున్నాడు. అతడి గత ప్రతిభను నమ్మి సెలక్టర్లు ఆసియా కప్‌కు అవకాశం ఇస్తారా, లేక ప్రస్తుత ఫామ్‌ను పరిగణనలోకి తీసుకుని పక్కన పెడతారా అన్నది వేచి చూడాలి.