‘మాస్ జాతర’ టీజర్ డేట్ ఫిక్స్... అభిమానులకు రవితేజ రాఖీ కానుక!

మాస్ మహారాజా రవితేజ అభిమానులు ఎంతో ఆసక్తిగా ఎదురుచూస్తున్న తాజా చిత్రం ‘మాస్ జాతర’. ఈ సినిమా నుంచి ఓ అదిరిపోయే అప్‌డేట్ వచ్చేసింది. రాఖీ పండుగను పురస్కరించుకుని చిత్ర బృందం ఈ సినిమా టీజర్‌ విడుదల తేదీని అధికారికంగా ప్రకటించింది. ఈ నెల‌ 11న ఉదయం 11:08 గంటలకు ‘మాస్ జాతర’ టీజర్‌ను విడుదల చేయనున్నట్లు తెలుపుతూ ఓ కొత్త పోస్టర్‌ను విడుద‌ల చేసింది. దీంతో సోషల్ మీడియాలో సందడి మొదలైంది.

ఈ చిత్రాన్ని వినాయక చవితి కానుకగా ఆగష్టు 27న ప్రపంచవ్యాప్తంగా విడుదల చేసేందుకు నిర్మాతలు సన్నాహాలు చేస్తున్నారు. విడుదల తేదీ దగ్గర పడుతుండటంతో ప్రచార కార్యక్రమాలను వేగవంతం చేశారు. అందులో భాగంగానే ఇప్పుడు టీజర్ అప్‌డేట్‌తో ప్రేక్షకుల ముందుకు వచ్చారు. ఈ సినిమాలో రవితేజ సరసన క్రేజీ హీరోయిన్ శ్రీలీల మరోసారి జోడీ కడుతోంది. వీరిద్దరి కాంబినేషన్‌లో వస్తున్న సినిమా కావడంతో ప్రేక్షకుల్లో భారీ అంచనాలు నెలకొన్నాయి.

‘మాస్ జాతర’ చిత్రానికి భాను భోగవరపు దర్శకత్వం వహిస్తున్నారు. ప్రతిష్ఠాత్మక నిర్మాణ సంస్థలు సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు. పక్కా మాస్ యాక్షన్ ఎంటర్‌టైనర్‌గా రూపుదిద్దుకుంటున్న ఈ సినిమాకు భీమ్స్ సిసిరోలియో సంగీతం అందిస్తున్నారు. పండగ సీజన్‌లో వస్తున్న ఈ సినిమా బాక్సాఫీస్ వద్ద ఎలాంటి విజయాన్ని అందుకుంటుందో చూడాలి.