ఐదో టెస్టు.. జైస్వాల్ హాఫ్ సెంచరీ.. భారత్‌కు 52 పరుగుల ఆధిక్యం

ఇంగ్లండ్‌తో జరుగుతున్న చివరి, నిర్ణయాత్మక టెస్టులో యువ ఓపెనర్ యశస్వి జైస్వాల్ అద్భుతమైన పోరాటపటిమ కనబరిచాడు. క్లిష్ట పరిస్థితుల్లో అజేయ అర్ధశతకంతో నిలవడంతో, రెండో రోజు ఆట ముగిసేసరికి టీమిండియా పటిష్ఠ‌ స్థితిలో నిలిచింది. వెలుతురు సరిగా లేకపోవడంతో అంపైర్లు ఆటను ముందుగానే నిలిపివేయగా, భారత్ తన రెండో ఇన్నింగ్స్‌లో 2 వికెట్ల నష్టానికి 75 పరుగులు చేసింది.

లండన్‌లోని ది ఓవల్ మైదానంలో జరుగుతున్న ఈ మ్యాచ్‌లో, రెండో రోజైన శుక్రవారం ఆట ముగిసే సమయానికి భారత్ 52 పరుగుల కీలక ఆధిక్యాన్ని సంపాదించింది. అంతకుముందు ఇంగ్లండ్‌ను తొలి ఇన్నింగ్స్‌లో కట్టడి చేసిన భారత్, రెండో ఇన్నింగ్స్ ప్రారంభించింది. ఓపెనర్లు కేఎల్ రాహుల్‌, యశస్వి జైస్వాల్ నిలకడగా ఆరంభం అందించారు. అయితే, రాహుల్‌  (7) ఔటైన తర్వాత జైస్వాల్ పూర్తి బాధ్యతను తనపై వేసుకున్నాడు. ఆకాశ‌మే హ‌ద్దుగా చెల‌రేగిన జైస్వాల్ 49 బంతుల్లోనే 7 ఫోర్లు, 2 సిక్స‌ర్ల‌తో అజేయంగా 51 పరుగులు చేశాడు. మ‌రో బ్యాట‌ర్ సాయి సుద‌ర్శ‌న్ (11) నిరాశ‌ప‌రిచాడు. 

మరిన్ని వికెట్లు పడగొట్టి భారత్‌ను ఒత్తిడిలోకి నెట్టాలని భావించిన ఇంగ్లండ్ ఆశలకు వెలుతురు లేమి గండికొట్టింది. దీంతో అంపైర్లు ముందుగానే ఆటను నిలిపివేశారు. దీంతో టీమిండియా రెండో రోజు ఆట ముగిసే స‌మ‌యానికి 18 ఓవ‌ర్ల‌లో 2 వికెట్లు కోల్పోయి 75 ప‌రుగులు చేసింది. ప్రస్తుతం ఇంగ్లండ్‌పై భార‌త్‌ 52 పరుగుల కీలక ఆధిక్యంలో ఉంది. మూడో రోజు ఆటలో ఈ ఆధిక్యాన్ని మరింత పెంచుకోవాలని భారత్, త్వరగా వికెట్లు తీసి తిరిగి పోటీలోకి రావాలని ఇంగ్లండ్ భావిస్తున్నాయి. మూడో రోజు జైస్వాల్, మిగతా బ్యాటర్లు ఇదే జోరును కొనసాగించి భారీ లక్ష్యాన్ని నిర్దేశించాలని అభిమానులు ఆశిస్తున్నారు.

సంక్షిప్త స్కోర్లు
భారత్‌ తొలి ఇన్నింగ్స్‌: 224 ఆలౌట్‌ (కరుణ్‌ 57, సాయి 38, అట్కిన్సన్‌ 5/33, టంగ్‌ 3/57);
ఇంగ్లండ్‌ తొలి ఇన్నింగ్స్‌: 51.2 ఓవర్లలో 247 ఆలౌట్‌ (క్రాలీ 64, బ్రూక్‌ 53, ప్రసిద్ధ్‌ 4/62, సిరాజ్‌ 4/86);
భారత్‌ రెండో ఇన్నింగ్స్‌: 18 ఓవర్లలో 75/2 (జైస్వాల్ 51 నాటౌట్, టంగ్‌ 1/25).