హైడ్రా పనితీరు అద్భుతం: హైదరాబాద్‌లో కర్ణాటక ఇంజినీర్ల బృందం

తెలంగాణ ప్రభుత్వం ప్రతిష్ఠాత్మకంగా చేపట్టిన చెరువుల పరిరక్షణ కార్యక్రమం ఇతర రాష్ట్రాలకు ఆదర్శంగా నిలుస్తోంది. హైదరాబాద్‌లో 'హైడ్రా' ఆధ్వర్యంలో జరుగుతున్న చెరువుల పునరుద్ధరణ పనులను కర్ణాటకకు చెందిన ఇంజనీర్ల బృందం మంగళవారం పరిశీలించింది. తెలంగాణ ప్రభుత్వం అనుసరిస్తున్న విధానాలను చూసి వారు ప్రశంసల వర్షం కురిపించారు.

హైదరాబాద్ పర్యటనలో భాగంగా, కాలుష్యం బారిన పడి పూర్తిగా కనుమరుగైన చెరువులను హైడ్రా అభివృద్ధి చేస్తున్న తీరు అద్భుతంగా ఉందని ఇంజనీర్ల బృందం అభిప్రాయపడింది. చెరువులు, నాలాలు, ప్రభుత్వ భూములను కాపాడటం కత్తి మీద సాము లాంటిదని, అలాంటి క్లిష్టమైన పనిని తెలంగాణ ప్రభుత్వం సమర్థంగా నిర్వహిస్తోందని కొనియాడింది. చెరువులు, నాలాలు కబ్జాలకు గురికావడం వల్లే నగరాల్లో వరదలు ముంచెత్తుతున్నాయని వారు పేర్కొన్నారు.

హైడ్రా గురించి పత్రికల్లో చదివి ప్రత్యక్షంగా చూసేందుకు ఇక్కడికి వచ్చామని బృంద సభ్యులు తెలిపారు. తమ రాష్ట్రంలో కూడా ఇలాంటి సమస్యలను ఎదుర్కొనేందుకు హైడ్రా తరహాలో ఒక ప్రత్యేక వ్యవస్థను ఏర్పాటు చేసే దిశగా కర్ణాటక ప్రభుత్వం చర్యలు తీసుకుంటోందని వారు వెల్లడించారు. అన్ని రాష్ట్రాలకు ఇలాంటి వ్యవస్థ ఎంతో అవసరమని వారు స్పష్టం చేశారు. ప్రారంభంలో కేవలం చెరువుల పరిరక్షణకే పరిమితమైన హైడ్రా, ప్రస్తుతం తన పరిధిని విస్తరించుకుని సమగ్రంగా పనిచేస్తున్న విషయం తెలిసిందే.