ఈ జపాన్ కంపెనీ మీ బ్రెయిన్ వేవ్ డేటాకు డబ్బు చెల్లిస్తుంది!

మనిషి ఆలోచనలకు ఓ రూపాన్నిచ్చి, దాన్ని కళాఖండంగా మార్చి అమ్మకానికి పెడితే ఎలా ఉంటుంది? వినడానికి వింతగా ఉన్నా, జపాన్‌లోని ఓ సంస్థ దీన్నే నిజం చేస్తోంది. టోక్యో కేంద్రంగా పనిచేస్తున్న బీడబ్ల్యూటీసీ (బ్రెయిన్‌వేవ్ టు ది క్రియేషన్) అనే సంస్థ, ప్రజల మెదడు తరంగాల డేటాను కొనుగోలు చేస్తూ అందరి దృష్టిని ఆకర్షిస్తోంది. కేవలం 100 సెకన్ల పాటు తమ మెదడు తరంగాలను స్కాన్ చేయించుకోవడానికి వచ్చిన వారికి 1,000 జపనీస్ యెన్లు (సుమారు రూ. 590) చెల్లిస్తోంది.

ఈ ప్రక్రియ చాలా సులభంగా ఉంటుంది. ఆసక్తి ఉన్నవారు టోక్యోలోని చియోడా జిల్లాలో ఉన్న బీడబ్ల్యూటీసీ మెటావర్స్ స్టోర్‌కు వెళ్లాలి. అక్కడ వారి తలపై ఒక ప్రత్యేక స్కానింగ్ పరికరాన్ని ఉంచుతారు. అది 100 సెకన్ల పాటు వారి మెదడులోని సంకేతాలను, ఆలోచనలను రికార్డ్ చేస్తుంది. అలా సేకరించిన ప్రత్యేకమైన డేటాను తక్షణమే ఒక ఆధునిక కళారూపంగా మారుస్తారు. ఇలా సృష్టించిన కళాఖండాలను ప్రదర్శనకు ఉంచి అమ్ముతారు. "ఈ డేటాను చిత్రాలుగా మార్చి, ఒక్కోదానికి ధర కేటాయిస్తాం. ఈ కళాఖండాలను ప్రజల ముందు ప్రదర్శించి విక్రయిస్తాం" అని బీడబ్ల్యూటీసీ నిర్వహణ బృందం తెలిపింది.

ఈ కళాఖండాల ధరను వాటి కళాత్మక విలువ, డేటాలోని ప్రత్యేకత, స్కానింగ్ సమయంలో వ్యక్తి మానసిక స్థితి వంటి అంశాల ఆధారంగా నిర్ణయిస్తారు. ఉదాహరణకు, స్కానింగ్ సమయంలో ట్రామ్ వీడియో చూసిన వ్యక్తి బ్రెయిన్‌వేవ్ ఆర్ట్‌కు రూ. 8,201 ధర నిర్ణయించగా, ఆహారం గురించి ఆలోచించిన వ్యక్తి ఆర్ట్‌కు రూ. 4,608 ధర పలికింది. ఇప్పటివరకు 1,853 మంది నుంచి మెదడు తరంగాల డేటాను కొనుగోలు చేసినట్లు కంపెనీ తన వెబ్‌సైట్‌లో పేర్కొంది. ఇప్పటికే జపాన్‌లోని ఇతర నగరాలతో పాటు తైవాన్‌లో కూడా ఈ వినూత్న కళా ప్రదర్శనలు నిర్వహించి మంచి స్పందన అందుకుంది.