హనీమూన్ ట్రిప్ పేరిట మోసం... కొత్త జంటకు కుచ్చుటోపీ!

యూరప్‌లో హనీమూన్ జరుపుకోవాలన్న ఓ నవ దంపతుల కలను ఓ ట్రావెల్ ఏజెన్సీ చిదిమేసింది. వారి నుంచి ఏకంగా రూ. 7.6 లక్షలు వసూలు చేసి, పెళ్లికి కేవలం మూడు రోజుల ముందు ట్రిప్ రద్దు చేసి నిలువునా ముంచింది. కోల్‌కతాలోని న్యూ అలీపూర్‌కు చెందిన ఈ జంటకు ఎదురైన ఈ చేదు అనుభవం, ట్రావెల్ ఏజెన్సీల మోసాలకు అద్దం పడుతోంది.

వివరాల్లోకి వెళితే, బాధితులు తమ యూరప్ హనీమూన్ ట్రిప్ కోసం సర్వే పార్క్-తూర్పు జాదవ్‌పూర్ ప్రాంతంలోని ఒక ట్రావెల్ ఏజెన్సీని సంప్రదించారు. జనవరి నుంచి ఏప్రిల్ మధ్య కాలంలో వివిధ విడతల్లో రూ. 7.6 లక్షలను ఆ ఏజెన్సీకి చెందిన బ్యాంకు ఖాతాకు బదిలీ చేశారు. మే 14న వారి ప్రయాణం ప్రారంభం కావాల్సి ఉండగా, పెళ్లికి కేవలం మూడు రోజులు ఉందనగా ట్రిప్ రద్దు చేస్తున్నట్లు ఏజెన్సీ నుంచి వారికి సందేశం వచ్చింది. వీసా దరఖాస్తుల కోసం తాము అడిగిన విమాన టికెట్లు, హోటల్ వోచర్లకు బదులుగా కన్ఫర్మ్ కాని నకిలీ బుకింగ్స్ ఇచ్చారని బాధితులు తమ ఫిర్యాదులో పేర్కొన్నారు.

ఈ మోసంపై దంపతులు పోలీసులకు ఫిర్యాదు చేయగా, ఏజెన్సీ యజమానులపై చీటింగ్, నేరపూరిత కుట్ర కింద కేసు నమోదు చేశారు. డబ్బులు తిరిగి ఇస్తామని నమ్మబలికిన ఏజెన్సీ యజమానులు, 45 రోజుల్లో నగదు చెల్లిస్తామని చెబుతూ జూన్ 27 తేదీతో రూ. 3.8 లక్షల చొప్పున రెండు పోస్ట్-డేటెడ్ చెక్కులు ఇచ్చారు. అయితే ఈ ఏజెన్సీ ఇలాగే మరికొందరిని కూడా మోసం చేసినట్లు ప్రాథమిక దర్యాప్తులో తేలింది.

ఇటీవల కోల్‌కతాలో ఇలాంటి ట్రావెల్ మోసాలు పెరిగిపోయాయని పోలీసులు తెలిపారు. గత వారమే ఓ టూర్ కంపెనీని రూ. 5.2 కోట్లకు మోసం చేసిన ఓ ట్రావెల్ ఏజెంట్‌ను అరెస్ట్ చేసినట్లు గుర్తుచేశారు. ఈ నేపథ్యంలో ప్రజలు అప్రమత్తంగా ఉండాలని అధికారులు హెచ్చరిస్తున్నారు. ట్రావెల్ ప్యాకేజీలు బుక్ చేసే ముందు ఏజెన్సీ లైసెన్స్, గత చరిత్రను క్షుణ్ణంగా పరిశీలించాలని సూచించారు. పూర్తి డబ్బును ముందుగానే చెల్లించవద్దని, హోటళ్లు, విమానయాన సంస్థలతో నేరుగా మాట్లాడి బుకింగ్స్ సరిచూసుకోవాలని తెలిపారు. ఎవరైనా అనుమానాస్పదంగా ప్రవర్తిస్తే వెంటనే సైబర్ క్రైమ్ పోలీసులకు ఫిర్యాదు చేయాలని కోరారు. గుర్తింపు పొందిన సంస్థల ద్వారా మాత్రమే బుకింగ్స్ చేసుకోవడం సురక్షితమని నిపుణులు సూచిస్తున్నారు.