తాడిపత్రికి వెళ్లేందుకు పెద్దారెడ్డి మరో ప్రయత్నం

అనంతపురం జిల్లా తాడిపత్రి రాజకీయాలు మరోసారి వేడెక్కాయి. మాజీ ఎమ్మెల్యే, వైసీపీ నేత కేతిరెడ్డి పెద్దారెడ్డి తాడిపత్రికి వెళ్లేందుకు చేస్తున్న ప్రయత్నాలు స్థానికంగా ఉత్కంఠ రేపుతున్నాయి.

వైసీపీ అధినేత జగన్ పిలుపునిచ్చిన 'రీకాలింగ్ చంద్రబాబు మేనిఫెస్టో' కార్యక్రమాన్ని తాడిపత్రిలో నిర్వహించాలని ఆయన నిర్ణయించారు. ఇందుకు అనుమతి ఇవ్వాలని కోరుతూ ఎస్పీ జగదీశ్‌కు తాజాగా ఓ లేఖ రాశారు. ఈ లేఖతో తాడిపత్రిలో ఆయన ప్రవేశం అంశం మళ్లీ తెరపైకి వచ్చింది. ఒకప్పుడు టీడీపీ నేత జేసీ ప్రభాకర్‌రెడ్డికి ఎదురైన పరిస్థితులే ఇప్పుడు కేతిరెడ్డికి ఎదురవుతున్నాయని రాజకీయ వర్గాల్లో చర్చ జరుగుతోంది.

వాస్తవానికి, కేతిరెడ్డి పెద్దారెడ్డి తాడిపత్రి వెళ్లేందుకు ఎలాంటి అడ్డంకులు లేవని, ఆయనకు తగిన భద్రత కల్పించాలని ఆంధ్రప్రదేశ్ హైకోర్టు ఏప్రిల్ 30వ తేదీన స్పష్టమైన ఆదేశాలు జారీ చేసింది. అయినప్పటికీ, గతంలో ఆయన చేసిన ప్రయత్నాలు ఫలించలేదు. ఇప్పుడు హైకోర్టు ఆదేశాలు, తాజాగా ఆయన రాసిన లేఖ నేపథ్యంలో ఈసారి పోలీసు యంత్రాంగం ఎలా స్పందిస్తుందనే దానిపై సర్వత్రా ఆసక్తి నెలకొంది. కేతిరెడ్డికి అనుమతి లభిస్తుందా లేదా అనే విషయంపై తాడిపత్రి రాజకీయ వర్గాల్లో జోరుగా చర్చ నడుస్తోంది.