డాక్టర్ నిర్వాకం... బయాప్సీ అని చెప్పి మర్మావయవాలు తొలగించాడు... రోగి లబోదిబో!

వైద్యం కోసం ఆసుపత్రికి వెళ్లిన ఓ వ్యక్తికి ఊహించని ఘోరం ఎదురైంది. చిన్న పరీక్ష అని చెప్పి, వైద్యుడు ఏకంగా అతని మర్మాంగాలనే తొలగించడం తీవ్ర కలకలం రేపుతోంది. ఈ అమానవీయ ఘటన అసోంలోని సిల్చార్‌లో చోటుచేసుకుంది. బాధితుడి ఫిర్యాదుతో ఈ దారుణం వెలుగులోకి వచ్చింది.

వివరాల్లోకి వెళితే... పొరుగు రాష్ట్రమైన మణిపూర్‌లోని జిరిబం జిల్లాకు చెందిన అతికుర్ రెహమాన్, జననాంగాల ఇన్ఫెక్షన్ చికిత్స కోసం అసోంలోని సిల్చార్‌లో ఉన్న ఓ ప్రైవేట్ ఆసుపత్రిని ఆశ్రయించాడు. అక్కడ డాక్టర్ సిన్హా అతడిని పరీక్షించి, ఆసుపత్రిలో చేర్చుకున్నారు. పలు పరీక్షలు నిర్వహించిన అనంతరం బయాప్సీ చేయాలని సూచించారు.

ఈ క్రమంలో, బయాప్సీ కోసం రెహమాన్‌ను ఆపరేషన్ థియేటర్‌కు తీసుకెళ్లారు. అయితే, తన అనుమతి లేకుండానే డాక్టర్ సిన్హా శస్త్రచికిత్స చేసి తన మర్మాంగాలను పూర్తిగా తొలగించారని బాధితుడు ఆరోపించాడు. “బయాప్సీ కోసం చిన్న కణజాల నమూనా మాత్రమే తీసుకుంటానని డాక్టర్ చెప్పారు. కానీ ఆపరేషన్ తర్వాత కట్టు విప్పి చూసుకోగా, నా మర్మాంగాలు లేకపోవడం చూసి షాక్‌కు గురయ్యాను” అని రెహమాన్ వాపోయాడు.

ఈ దారుణం తర్వాత డాక్టర్ సిన్హాను కలిసేందుకు ప్రయత్నించగా, ఆసుపత్రి యాజమాన్యం తనను అడ్డుకుందని బాధితుడు తెలిపాడు. ఆసుపత్రి నుంచి ఎలాంటి స్పందన రాకపోవడంతో, చివరకు పోలీసులను ఆశ్రయించి తనకు న్యాయం చేయాలని కోరుతూ డాక్టర్‌పై అధికారికంగా ఫిర్యాదు చేశాడు. ఈ ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు.