సెలబ్రిటీల సోషల్ మీడియా ఖాతాలపై హ్యాకర్ల పంజా.. శ్రుతి హాసన్ ఎక్స్ ఖాతా హ్యాక్

ప్రముఖ నటి శ్రుతి హాసన్ తన ఎక్స్ ఖాతా హ్యాకింగ్‌కు గురైనట్లు మంగళవారం వెల్లడించారు. ఈ విషయాన్ని ఆమె తన ఇన్‌స్టాగ్రామ్ వేదిక ద్వారా తెలియజేశారు. శ్రుతి హాసన్ తన ఇన్‌స్టాగ్రామ్ స్టోరీలో అభిమానులను ఉద్దేశిస్తూ, "ప్రియమైన అభిమానులకు... నా ట్విట్టర్ ఖాతా హ్యాక్ చేయబడిందని మీకు తెలియజేయాలనుకుంటున్నాను. అక్కడ పోస్ట్ అవుతున్నవి నేను చేస్తున్నవి కావు. కాబట్టి, దయచేసి ఆ పేజీలో చేసే పోస్టులు నావి కావని గుర్తించండి. ఖాతాను పునరుద్ధరించే వరకు ఎవరూ స్పందించవద్దు" అని పేర్కొన్నారు.

జాతీయ అవార్డు గ్రహీత, సంగీత దర్శకుడు డి. ఇమాన్ ఎక్స్ ఖాతా ఈ ఏడాది మార్చిలో హ్యాక్ అవ్వగా, అది వారం రోజుల క్రితమే పునరుద్ధరించబడింది. ఇప్పుడు శ్రుతి హాసన్ ఖాతా హ్యాకింగ్‌కు గురవడం గమనార్హం. గతంలో నటి, నిర్మాత ఖుష్బూ ఖాతా కూడా హ్యాకింగ్‌కు గురైంది.

సామాజిక మాధ్యమాల్లో శృతి హాసన్ చురుగ్గా ఉంటూ తమ అభిప్రాయాలను అభిమానులతో పంచుకుంటూ ఉంటారు. అయితే, మంగళవారం ఆమె అధికారిక ఎక్స్ ఖాతాలో అసాధారణ కార్యకలాపాలు చోటుచేసుకున్నాయి. ఆమె అకౌంట్ నుంచి బిట్‌కాయిన్‌కు సంబంధించిన కొన్ని పోస్టులతో పాటు, ఇతర ప్రచార సామగ్రి కూడా షేర్ అవ్వడం అభిమానులను గందరగోళానికి గురిచేసింది.

శృతి హాసన్ చివరిసారి నిన్న ఒక పోస్టు చేశారు. "వాతావరణం ఇంత చల్లగా, వర్షంగా ఉన్నప్పుడు ఇంత సంతోషంగా, ఉత్సాహంగా, సానుకూలంగా ఉండేది నేనొక్కదాన్నేనా? బహుశా కాకపోవచ్చు... ఇలాంటి వాతావరణం నాతో ఏదైనా రాయాలనిపిస్తుంది, మనసులను కదిలించాలనిపిస్తుంది" అంటూ ఆమె ఆ పోస్టులో పేర్కొన్నారు. సెలబ్రిటీల సోషల్ మీడియా ఖాతాలు వరుసగా హ్యాకింగ్‌కు గురవుతుండటం ఆందోళన కలిగిస్తోంది.