Hrithik Roshan: పెళ్లిలో వధువుకి అదిరిపోయే సర్‌ప్రైజ్.. 'ధూమ్ మచాలే' పాటకు వరుడి స్టెప్పులు.. హృతిక్ ప్రశంస
- పోర్చుగల్‌లో పెళ్లికొడుకు అదిరిపోయే డ్యాన్స్
- 'ధూమ్ 2' పాటకు ఫ్రెండ్స్‌తో కలిసి స్టెప్పులు
- సోషల్ మీడియాలో వైరల్ అయిన వీడియో
- డ్యాన్స్ చూసి స్పందించిన హీరో హృతిక్ రోషన్
పోర్చుగల్‌లో జరిగిన ఒక వివాహ వేడుకలో ఊహించని, హృద్యమైన సంఘటన చోటుచేసుకుంది. పెళ్లికొడుకు తన కాబోయే భార్యకు జీవితాంతం గుర్తుండిపోయే సర్‌ప్రైజ్ ఇచ్చాడు. బాలీవుడ్ ఐకానిక్ సాంగ్ 'ధూమ్ అగైన్' పాటకు అద్భుతంగా డ్యాన్స్ చేసి అందరినీ ఆశ్చర్యపరిచాడు. ఈ వీడియో ప్రస్తుతం సోషల్ మీడియాలో తెగ వైరల్ అవుతోంది.
వివాహ వేడుకలో భాగంగా వరుడు తన స్నేహితులతో (బెస్ట్ మెన్) కలిసి 'ధూమ్ 2' సినిమాలోని సూపర్ హిట్ టైటిల్ ట్రాక్ 'ధూమ్ అగైన్' పాటకు అదిరిపోయే స్టెప్పులేశాడు. ఈ పాటలో హృతిక్ రోషన్ తన అసాధారణమైన ఎనర్జీ, డ్యాన్స్ మూమెంట్స్‌తో ఎంతగానో ఆకట్టుకున్న విషయం తెలిసిందే. పోర్చుగీస్ వరుడు కూడా హృతిక్ స్టెప్పులను రీక్రియేట్ చేయడానికి ప్రయత్నించాడు. పెళ్లికూతురు ఆనందంతో ఉబ్బితబ్బిబ్బవ్వగా, అక్కడున్నవారంతా చప్పట్లతో అభినందించారు.
ఈ అద్భుతమైన డ్యాన్స్ పెర్ఫార్మెన్స్‌కు సంబంధించిన వీడియోను 'లెటరింగ్‌బైసావ్' అనే ఇన్‌స్టాగ్రామ్ పేజీలో షేర్ చేశారు. "వెన్ ఎ వైట్ బాయ్ మ్యారీస్ ఎ బ్రౌన్ గర్ల్" (ఒక తెల్ల అబ్బాయి ఒక భారతీయ అమ్మాయిని పెళ్లి చేసుకున్నప్పుడు) అనే క్యాప్షన్‌తో ఈ వీడియోను పోస్ట్ చేయడంతో, ఇది సాంస్కృతిక వేడుకకు అద్దం పడుతోందని నెటిజన్లు కామెంట్లు చేస్తున్నారు. ఈ వీడియో అతి తక్కువ సమయంలోనే లక్షల వ్యూస్ సంపాదించి, సోషల్ మీడియా యూజర్లను విపరీతంగా ఆకట్టుకుంది.
హృతిక్ రోషన్ స్పందన
ఈ వైరల్ వీడియో ఏకంగా 'ధూమ్' స్టార్ హృతిక్ రోషన్ దృష్టిని కూడా ఆకర్షించడం విశేషం. వరుడి డ్యాన్స్ చూసిన హృతిక్ ఆ వీడియోపై స్పందించారు. దీంతో పెళ్లికొడుకు ఆనందానికి అవధుల్లేకుండా పోయాయి. హృతిక్ కామెంట్ చేయడంతో ఈ వీడియో మరింత వైరల్ అయింది.
'ధూమ్ 2' చిత్రం 2006లో విడుదలైంది. ఇందులో హృతిక్ రోషన్‌తో పాటు అభిషేక్ బచ్చన్, ఐశ్వర్య రాయ్, ఉదయ్ చోప్రా, బిపాసా బసు ప్రధాన పాత్రల్లో నటించారు. ఈ సినిమాలోని పాటలు, ముఖ్యంగా 'ధూమ్ అగైన్' పాట ఇప్పటికీ సంగీత ప్రియులను ఉర్రూతలూగిస్తూనే ఉంది. ఇప్పుడు పోర్చుగల్ వరుడి డ్యాన్స్ పుణ్యమా అని ఈ పాట మరోసారి ట్రెండింగ్‌లోకి వచ్చింది.
