Varalaxmi Sarathkumar: నెట్ ఫ్లిక్స్ లో వరలక్ష్మి శరత్ కుమార్ హారర్ థ్రిల్లర్!
- 2022లో థియేటర్లకు వచ్చిన సినిమా
- జానపద కథను తలపించే కంటెంట్
- కామెడీ టచ్ తో సాగే హారర్ థ్రిల్లర్
- వరలక్ష్మి శరత్ కుమార్ ఎపిసోడ్ హైలైట్
హారర్ థ్రిల్లర్ జోనర్ కి ఓటీటీ ఫ్లాట్ ఫామ్ పై ఉన్న క్రేజ్ అంతా ఇంతా కాదు. ఈ జోనర్ నుంచి కొత్తగా ఎప్పటికప్పుడు కొత్త కంటెంట్ దిగిపోతూనే ఉంటుంది. ఒకవేళ కొత్తగా ఈ జోనర్ నుంచి ఏ సినిమా రాకపోయినా, గతంలో వచ్చిన హారర్ థ్రిల్లర్స్ లో ఏది ఎక్కువగా కనెక్ట్ అవుతుతుందనేది సెర్చ్ చేస్తూ వెళతారు. అలాంటి వారికి కామెడీ టచ్ తో సాగే తమిళ హారర్ థ్రిల్లర్ ఒకటి నచ్చే అవకాశాలు ఉన్నాయి. తెలుగులోనూ అందుబాటులో ఉన్న ఆ సినిమా పేరే 'కట్టేరి' .. అంటే 'రక్తపిశాచి' అని అర్థం.
జ్ఞానవేల్ రాజా - ఎస్ ఆర్ ప్రభు నిర్మించిన ఈ సినిమాకి, డీకే దర్శకత్వం వహించాడు. ఎస్ ఎన్ ప్రసాద్ నేపథ్య సంగీతాన్ని అందించిన ఈ సినిమా, 2022 ఆగస్టులో థియేటర్లకు వచ్చింది. థియేటర్స్ నుంచి ఓ మాదిరి రెస్పాన్స్ ను రాబట్టుకున్న ఈ సినిమా, ఆ తరువాత ఓటీటీ వైపుకు వచ్చింది. అలా ఓటీటీలో అడుగుపెట్టినప్పుడు ఎంతమంది చూశారోగానీ, ఈ మధ్య కాలంలో ఈ సినిమాను ఎక్కువ మంది చూస్తూ వెళుతుండటం గమనించవలసిన విషయం. వరలక్ష్మి శరత్ కుమార్ ఎపిసోడ్ ఈ సినిమాకి హైలైట్ అంటున్నారు.
కథ విషయానికి వస్తే .. అది అడవికి ఆనుకుని ఉన్న ఒక గ్రామం. ఆ విలేజ్ లో మత్తమ్మ (వరలక్ష్మి శరత్ కుమార్) ఆమె చెల్లెలు కలిసి నివసిస్తూ ఉంటారు. ఆ ఇంటి పెరటిలో ఒక పెద్ద బావి ఉంటుంది. ఆ బావిలో ఒక రక్తపిశాచి ఉంటుంది. ఆ పిశాచికి ఆహారంగా ఆ బావిలోకి ఎవరినైనా తోసేస్తే ఆ ఎత్తు బంగారాన్ని ఆ పిశాచి పైకి పంపుతూ ఉంటుంది. ఈ విషయం ఒక పోలీస్ ఆఫీసర్ కి తెలుస్తుంది. అప్పుడు ఏం జరుగుతుంది? ఆ నిధి కోసం ఆ ఊరికి చేరుకున్న హీరో బ్యాచ్ కి ఎలాంటి పరిస్థితి ఎదురవుతుంది? అనేది కథ.
