రూ.51 లక్షల నగదు, నగలు దొంగిలించిన హెడ్ కానిస్టేబుల్ అరెస్ట్

దేశ రాజధాని ఢిల్లీలో పోలీసు శాఖకే తలవంపులు తెచ్చే ఘటన చోటుచేసుకుంది. ప్రజల సొత్తుకు రక్షణ కల్పించాల్సిన ఓ పోలీసు దొంగతనానికి పాల్పడి కటకటాలపాలయ్యాడు. ఢిల్లీ పోలీస్ స్పెషల్ సెల్‌కు చెందిన ఓ హెడ్ కానిస్టేబుల్ తమ కార్యాలయం నుంచే భారీగా నగదు, ఆభరణాలు అపహరించిన ఉదంతం ఆలస్యంగా వెలుగులోకి వచ్చింది.

వివరాల్లోకి వెళితే, ఢిల్లీ పోలీస్ స్పెషల్ సెల్‌లో గతంలో విధులు నిర్వహించి, ఇటీవలే తూర్పు ఢిల్లీకి బదిలీ అయిన హెడ్ కానిస్టేబుల్ ఖుర్షీద్ ఈ దారుణానికి ఒడిగట్టాడు. గత శుక్రవారం రాత్రి లోధి రోడ్డులోని స్పెషల్ సెల్ కార్యాలయంలో ఉన్న మాల్ ఖానా (కేసులకు సంబంధించిన సొత్తు భద్రపరిచే స్థలం) నుంచి సుమారు 51 లక్షల రూపాయల నగదుతో పాటు పెద్ద మొత్తంలో బంగారు ఆభరణాలను ఖుర్షీద్ అపహరించుకుపోయాడు.

కొంతకాలం క్రితం వరకు ఖుర్షీద్ ఇదే మాల్ ఖానాలో విధులు నిర్వహించడం గమనార్హం. దొంగతనం జరిగిన విషయాన్ని మాల్ ఖానా ఇంచార్జ్ వెంటనే గుర్తించారు. ఉన్నతాధికారులకు సమాచారం అందించడంతో, వారు సీసీటీవీ ఫుటేజ్‌ను పరిశీలించారు. ఫుటేజ్‌లో ఖుర్షీద్ దొంగతనం చేస్తూ స్పష్టంగా కనిపించడంతో, స్పెషల్ సెల్ బృందాలు శనివారమే అతడిని అదుపులోకి తీసుకున్నాయి. ఈ ఘటనపై కేసు నమోదు చేసి దర్యాప్తు చేస్తున్నారు.