బీఎస్ఎఫ్ మహిళా అధికారిణికి ఆర్మీ చీఫ్ ప్రశంస

బార్డర్ సెక్యూరిటీ ఫోర్స్ (బీఎస్ఎఫ్) అసిస్టెంట్ కమాండెంట్ నేహా భండారి అసాధారణ ధైర్యసాహసాలు, కార్యాచరణ నైపుణ్యం ప్రదర్శించారు. జమ్మూ సరిహద్దులో జరిగిన "ఆపరేషన్ సిందూర్"లో ఆమె కనబరిచిన ప్రతిభకు గుర్తింపుగా ఆర్మీ చీఫ్ (సీఓఏఎస్) జనరల్ ఉపేంద్ర ద్వివేది శుక్రవారం ఆమెను ప్రశంసా పతకంతో సత్కరించారు. ఈ విషయాన్ని బీఎస్ఎఫ్ జమ్మూ అధికారికంగా వెల్లడించింది.

అంతర్జాతీయ సరిహద్దు వెంబడి పాకిస్థానీ పోస్టుకు అత్యంత సమీపంలో ఉన్న ఒక కీలకమైన సరిహద్దు అవుట్‌పోస్ట్‌కు నేహా భండారి నాయకత్వం వహించారు. ఆపరేషన్ సిందూర్ సమయంలో ఆమె తన దళాలతో కలిసి శత్రువులకు దీటుగా జవాబిస్తూ, జీరో లైన్ అవతల ఉన్న మూడు పాకిస్థానీ ఫార్వర్డ్ పోస్టులను నిర్వీర్యం చేశారు. సవాలుతో కూడిన పరిస్థితుల్లో ఫార్వర్డ్ ఏరియాలో తన బృందాన్ని ఆమె ధైర్యంగా నడిపించారని అధికారులు తెలిపారు. ఈ ఆపరేషన్‌లో నేహా భండారితో పాటు మరో ఆరుగురు మహిళా కానిస్టేబుళ్లు పాల్గొన్నారు. సాంబా, ఆర్ఎస్ పురా, అఖ్నూర్ సెక్టార్లలోని ఫార్వర్డ్ పోస్టుల వద్ద వీరు గన్ పొజిషన్లలో ఉండి, శత్రు స్థావరాలపై ప్రతి బుల్లెట్‌ను ఎంతో ఉత్సాహంతో ప్రయోగించారు.

తాత, తల్లిదండ్రులు కూడా సైనికులే..
ఉత్తరాఖండ్‌కు చెందిన నేహా భండారి తన కుటుంబంలో మూడో తరం అధికారి కావడం విశేషం. ఆమె తాత భారత సైన్యంలో పనిచేశారు. తల్లిదండ్రులిద్దరూ సెంట్రల్ రిజర్వ్ పోలీస్ ఫోర్స్ (సీఆర్పీఎఫ్)లో సేవలు అందించారు. జమ్మూ జిల్లాలోని అఖ్నూర్ సెక్టార్ పర్గ్వాల్ ఫార్వర్డ్ ప్రాంతంలో పాకిస్థాన్ పోస్టుకు సుమారు 150 మీటర్ల దూరంలో ఉన్న పోస్టుకు నాయకత్వం వహించడం గర్వంగా ఉందని నేహా భండారి బుధవారం పీటీఐ వార్తా సంస్థతో అన్నారు. "నా దళాలతో కలిసి అంతర్జాతీయ సరిహద్దులో విధులు నిర్వర్తించడం గర్వకారణం" అని ఆమె తెలిపారు.