పోలీసుల ఎన్‌కౌంటర్‌లో రూ.5 లక్షల రివార్డున్న నక్సలైట్ మృతి

ఝార్ఖండ్‌లోని లాతేహార్ జిల్లాలో పోలీసులకు, నక్సలైట్లకు మధ్య జరిగిన భీకర ఎదురుకాల్పుల్లో కీలక నక్సలైట్ ఒకరు మరణించారు. మరో నక్సలైట్‌ను పోలీసులు అరెస్టు చేశారు. ఈ ఘటనలో భారీగా ఆయుధాలను స్వాధీనం చేసుకున్నట్లు అధికారులు వెల్లడించారు. ఆదివారం రాత్రి నుంచి సోమవారం ఉదయం వరకు లాతేహార్ పోలీసులకు, నక్సలైట్లకు మధ్య కాల్పులు కొనసాగాయి. ఈ ఎన్‌కౌంటర్‌లో రూ.5 లక్షల రివార్డు ఉన్న మనీశ్ యాదవ్ అనే నక్సలైట్ మరణించినట్టు పలామూ డీఐజీ వైఎస్ రమేశ్ ధ్రువీకరించారు. మనీశ్ యాదవ్ చాలా కాలంగా పలు హింసాత్మక ఘటనల్లో పోలీసులకు మోస్ట్ వాంటెడ్‌గా ఉన్నాడు.

ఈ ఆపరేషన్‌లో భాగంగా తలపై రూ. 10 లక్షల రివార్డు ఉన్న కుందన్ ఖేర్వార్ అనే మరో నక్సలైట్‌ను పోలీసులు చాకచక్యంగా పట్టుకున్నారు. ఘటనా స్థలం నుంచి రెండు అత్యాధునిక ఎక్స్ 95 ఆటోమేటిక్ రైఫిళ్లను స్వాధీనం చేసుకున్నట్టు పోలీసులు తెలిపారు.

ఈ ఎదురుకాల్పుల ఘటన మహుదానర్ పోలీస్ స్టేషన్ పరిధిలోని కరమ్‌ఖాడ్, దౌనా గ్రామాల మధ్య అటవీ ప్రాంతంలో చోటుచేసుకుంది. ఎన్‌కౌంటర్ అనంతరం పోలీసులు ఆ ప్రాంతంలో విస్తృతంగా గాలింపు చర్యలు చేపట్టారు. సమీప ప్రాంతాలను జల్లెడ పడుతూ, ఇంకా ఎవరైనా నక్సలైట్లు నక్కి ఉన్నారేమోనని తనిఖీలు నిర్వహిస్తున్నారు.