'ఆంధ్ర కింగ్ తాలూకా’ సెట్స్ లో ఉపేంద్ర.. రామ్ తో సందడి

ఎనర్జిటిక్ స్టార్ రామ్ పోతినేని కథానాయకుడిగా నటిస్తున్న తాజా చిత్రం ‘ఆంధ్ర కింగ్ తాలూకా’. పి. మహేష్ బాబు దర్శకత్వం వహిస్తున్న ఈ సినిమా చిత్రీకరణలో ప్రముఖ కన్నడ నటుడు ఉపేంద్ర శనివారం చేరారు. ఈ విషయాన్ని చిత్ర నిర్మాణ సంస్థ మైత్రీ మూవీ మేకర్స్ తమ అధికారిక ఎక్స్  ఖాతా ద్వారా తెలియజేసింది. ఉపేంద్ర సెట్స్ లో ఉన్న ఫోటోను పంచుకుంటూ, "మా 'సూర్య కుమార్' వచ్చేశారు. ఎనర్జిటిక్ స్టార్ రామ్ నటిస్తున్న 'ఆంధ్ర కింగ్ తాలూకా' సెట్స్ లో ఉపేంద్ర కీలక షెడ్యూల్ కోసం చేరారు. షూటింగ్ వేగంగా జరుగుతోంది" అని పేర్కొంది.

ఈ చిత్రంలో ఉపేంద్ర 'సూర్య కుమార్' అనే ఓ సూపర్ స్టార్ పాత్రలో కనిపించనున్నారని తెలుస్తోంది. ఇప్పటికే విడుదలైన టైటిల్ టీజర్ సినిమాపై ఆసక్తిని పెంచింది. సాగర్ అనే ఓ అభిమాని బయోపిక్ గా ఈ సినిమా రూపుదిద్దుకుంటోందని సమాచారం.

ఈ సినిమాలో రామ్ పోతినేని సరసన భాగ్యశ్రీ బోర్సే కథానాయికగా నటిస్తున్నారు. రావు రమేష్, మురళీ శర్మ, సత్య, రాహుల్ రామకృష్ణ, విటివి గణేష్ వంటి ప్రముఖ నటీనటులు ఇతర కీలక పాత్రలు పోషిస్తున్నారు. మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ ఈ చిత్రాన్ని భారీ బడ్జెట్ తో నిర్మిస్తున్నారు. సిద్ధార్థ నూని ఛాయాగ్రహణం అందిస్తుండగా, వివేక్-మెర్విన్ ద్వయం సంగీతాన్ని సమకూరుస్తున్నారు. జాతీయ అవార్డు గ్రహీత శ్రీకర్ ప్రసాద్ ఎడిటింగ్ బాధ్యతలు, అవినాష్ కొల్లా ప్రొడక్షన్ డిజైన్ పనులు చూస్తున్నారు. సినిమా షూటింగ్ శరవేగంగా జరుగుతున్నట్లు చిత్ర వర్గాలు తెలిపాయి.