అది భాషా దోషం... కల్నల్ సోఫియా ఖురేషికి మరోసారి సారీ చెప్పిన మధ్యప్రదేశ్ మంత్రి

మధ్యప్రదేశ్ గిరిజన వ్యవహారాల శాఖ మంత్రి విజయ్ షా, మహిళా ఆర్మీ అధికారి కల్నల్ సోఫియా ఖురేషీపై తాను చేసిన వివాదాస్పద వ్యాఖ్యలకు మరోసారి క్షమాపణలు తెలిపారు. అది కేవలం 'భాషా దోషం' అని, ఏ మత వర్గాన్ని నొప్పించాలనే ఉద్దేశం తనకు లేదని స్పష్టం చేస్తూ శుక్రవారం ఒక వీడియో సందేశాన్ని విడుదల చేశారు.

కొన్ని రోజుల క్రితం పహల్గామ్‌లో జరిగిన మారణకాండ తనను తీవ్రంగా కలచివేసిందని, తనకు దేశంపట్ల, సైన్యంపట్ల అపారమైన గౌరవం ఉందని షా పేర్కొన్నారు. "నా మాటలు ఒక వర్గాన్ని, మతాన్ని, దేశప్రజలను బాధించాయి. అది నా భాషాపరమైన తప్పిదమే. ఏ మతాన్ని, కులాన్ని, లేదా వర్గాన్ని కించపరచాలనేది నా ఉద్దేశం కాదు. పొరపాటున నేను అన్న మాటలకు భారత సైన్యానికి, సోదరి కల్నల్ సోఫియాకు, దేశప్రజలందరికీ మనస్ఫూర్తిగా క్షమాపణలు చెబుతున్నాను" అని ఆయన ఆవేదన వ్యక్తం చేశారు.

పహల్గామ్ ఉగ్రదాడి నేపథ్యంలో, ప్రతీకారం తీర్చుకోవడానికి ప్రధాని మోదీ "ఉగ్రవాదుల సోదరిని" (కల్నల్ ఖురేషీని ఉద్దేశిస్తూ) పంపారని షా వ్యాఖ్యానించారు. "వారు మన సోదరీమణులను వితంతువులుగా మార్చారు, కాబట్టి మోదీజీ వారి వర్గానికి చెందిన ఒక సోదరిని పంపి వారికి గుణపాఠం చెప్పించారు" అని మే 12న చేసిన వ్యాఖ్యలు మతపరమైనవిగా, లింగ వివక్షతో కూడినవిగా తీవ్ర దుమారం రేపాయి.

ఈ వ్యాఖ్యలపై తీవ్ర ఆగ్రహం వ్యక్తం చేసిన మధ్యప్రదేశ్ హైకోర్టు, వాటిని 'నీచమైనవి'గా అభివర్ణిస్తూ, మంత్రిపై ఎఫ్ఐఆర్ నమోదు చేయాలని ఆదేశించింది. సుప్రీంకోర్టు కూడా మంత్రి వ్యాఖ్యలను తప్పుబడుతూ, రాజ్యాంగ పదవుల్లో ఉన్నవారు సంయమనం పాటించాలని హితవు పలికింది. హైకోర్టు ఆదేశాలపై స్టే ఇచ్చేందుకు నిరాకరించింది. ప్రస్తుతం ఈ కేసుపై రాష్ట్ర పోలీసులు ఏర్పాటు చేసిన ప్రత్యేక దర్యాప్తు బృందం (సిట్) దర్యాప్తు చేస్తోంది.