భారత విమానాలకు మరో నెల పాకిస్థాన్ గగనతలం బంద్!

భారత విమానాలకు తమ గగనతలాన్ని మూసివేస్తూ పాకిస్థాన్ తీసుకున్న నిర్ణయాన్ని మరో నెల రోజుల పాటు పొడిగించినట్టు తెలుస్తోంది. ఇరు దేశాల మధ్య నెలకొన్న ఉద్రిక్త పరిస్థితుల నేపథ్యంలో పాకిస్థాన్ ఈ నిర్ణయం తీసుకున్నట్లు బుధవారం ఒక మీడియా కథనం ద్వారా వెల్లడైంది.

ఏప్రిల్ 22న పహల్గామ్‌లో జరిగిన ఉగ్రదాడి అనంతరం భారత్ చేపట్టిన చర్యలకు ప్రతిస్పందనగా, పాకిస్థాన్ గత నెలలో భారత విమానాలపై తమ గగనతలంలో ప్రయాణించకుండా నిషేధం విధించింది. అంతర్జాతీయ పౌర విమానయాన సంస్థ నిబంధనల ప్రకారం గగనతల ఆంక్షలను ఒకేసారి నెల రోజులకు మించి విధించకూడదు. దీంతో మే 23 వరకు ఈ నిషేధం అమల్లో ఉంది.

తాజాగా ఈ నిషేధాన్ని మరో నెల పొడిగించాలని పాకిస్థాన్ నిర్ణయించినట్లు జియో న్యూస్ వర్గాలు పేర్కొన్నాయి. దీనికి సంబంధించిన అధికారిక ప్రకటన (నోటీస్ టు ఎయిర్‌మెన్ - నోటమ్) బుధవారం లేదా గురువారం వెలువడే అవకాశం ఉందని ఆ కథనం తెలిపింది.

ఏప్రిల్ 22న పహల్గామ్‌లో జరిగిన ఉగ్రదాడిలో 26 మంది పర్యాటకులు మరణించిన విషయం తెలిసిందే. ఈ దాడికి ప్రతిస్పందనగా మే 7న భారత సైన్యం 'ఆపరేషన్ సిందూర్' పేరుతో పాకిస్థాన్, పీఓకేలోని ఉగ్రవాద స్థావరాలపై దాడులు నిర్వహించింది. ఈ పరిణామాల నేపథ్యంలో ఇరు దేశాల మధ్య ఉద్రిక్తతలు మరింత తీవ్రమయ్యాయి. మే 10న పాకిస్థాన్ సైనిక స్థావరాలపై భారత్ దాడులు చేయగా, ఆ తర్వాత సైనిక చర్యలను ఆపాలని పాకిస్థాన్ కోరింది.