Ravi Shastri: బుమ్రాకు మాత్రం కెప్టెన్సీ ఇవ్వొద్దు: రవిశాస్త్రి సంచలన వ్యాఖ్యలు
- రోహిత్ రిటైర్మెంట్ తర్వాత భారత జట్టు కెప్టెన్సీపై రవిశాస్త్రి కీలక వ్యాఖ్యలు
- గిల్ లేదా పంత్‌ను తదుపరి టెస్ట్ కెప్టెన్‌గా తీర్చిదిద్దాలని సూచన
- గాయాల చరిత్ర దృష్ట్యా బుమ్రాకు కెప్టెన్సీ బాధ్యతలు అప్పగించవద్దని హితవు
భారత క్రికెట్ జట్టు టెస్టు ఫార్మాట్‌కు రోహిత్ శర్మ వీడ్కోలు పలికిన నేపథ్యంలో, తదుపరి సారథి ఎవరనే దానిపై తీవ్ర చర్చ జరుగుతోంది. ఈ క్రమంలో, టీమిండియా మాజీ హెడ్ కోచ్ రవిశాస్త్రి తన అభిప్రాయాలను స్పష్టంగా వెల్లడించారు. భవిష్యత్తును దృష్టిలో ఉంచుకుని యువ ఆటగాళ్లను కెప్టెన్లుగా తీర్చిదిద్దాలని, ఈ బాధ్యతలకు శుభ్‌మన్ గిల్ లేదా రిషభ్ పంత్ సరైన వారని ఆయన సూచించారు. అయితే, స్టార్ పేసర్ జస్‌ప్రీత్ బుమ్రాకు మాత్రం కెప్టెన్సీ భారం అప్పగించవద్దని ఆయన గట్టిగా హెచ్చరించారు.
ది ఐసీసీ రివ్యూ కార్యక్రమంలో యాంకర్ సంజనా గణేశన్‌ (బుమ్రా అర్ధాంగి)తో మాట్లాడుతూ రవిశాస్త్రి పలు కీలక అంశాలను ప్రస్తావించారు. "నిజానికి, ఆస్ట్రేలియా పర్యటన తర్వాత బుమ్రానే కెప్టెన్సీకి నా మొదటి ఎంపికగా ఉండేవాడు. కానీ, అతడిని కెప్టెన్‌గా చేసి, ఆ తర్వాత ఒక బౌలర్‌గా అతడి సేవలు కోల్పోవాలని నేను అనుకోవడం లేదు" అని శాస్త్రి అన్నారు. గతంలో బుమ్రా వెన్ను గాయంతో కొన్ని నెలల పాటు ఆటకు దూరమయ్యాడని, దాంతో కీలకమైన ఐసీసీ ఛాంపియన్స్ ట్రోఫీ 2025 టోర్నీకి కూడా అందుబాటులో లేకుండా పోయాడని గుర్తు చేశారు.
"బుమ్రా తన శరీరాన్ని చాలా జాగ్రత్తగా చూసుకోవాలి. తీవ్రమైన గాయం నుంచి ఇప్పుడిప్పుడే కోలుకుంటున్నాడు. ఐపీఎల్‌లో నాలుగు ఓవర్ల క్రికెట్ ఆడాడు. ఇప్పుడు టెస్టుల్లో 10, 15 ఓవర్లు బౌలింగ్ చేయగల సత్తాకు అసలు పరీక్ష ఉంటుంది. ఇలాంటి సమయంలో కెప్టెన్సీ ఒత్తిడి అతనిపై ఉండటం ఏమాత్రం మంచిది కాదు,ః" అని శాస్త్రి విశ్లేషించారు.
బుమ్రాకు బదులుగా యువ ఆటగాళ్లైన శుభ్‌మన్ గిల్, రిషభ్ పంత్‌లకు అవకాశం ఇవ్వాలని శాస్త్రి గట్టిగా సూచించారు. "ఎవరినైనా భవిష్యత్తు కోసం తీర్చిదిద్దాలి. నా దృష్టిలో శుభ్‌మన్ చాలా బెటర్. అతనికి అవకాశం ఇవ్వండి. ప్రస్తుతం 25, 26 ఏళ్ల వయసులో ఉన్నాడు, అతనికి తగినంత సమయం కూడా ఇవ్వాలి" అని తెలిపారు. "అలాగే రిషభ్ పంత్ కూడా ఉన్నాడు. వారి వయసు, వారికి ముందున్న సుదీర్ఘ కెరీర్ దృష్ట్యా ఈ ఇద్దరూ సరైన అభ్యర్థులని నేను భావిస్తున్నాను. వారిని నేర్చుకోనివ్వండి" అని శాస్త్రి వివరించారు.
రోహిత్ శర్మ, విరాట్ కోహ్లీ వంటి సీనియర్లు టెస్టుల నుంచి వైదొలగడంతో, జట్టు భవిష్యత్తును దృష్టిలో ఉంచుకోవాల్సిన అవసరం ఉందని, అందుకే గిల్ లేదా పంత్ సరైనవారని ఆయన అభిప్రాయపడ్డారు. ఈ ఇద్దరు ఆటగాళ్లకు ఐపీఎల్‌లో తమ ఫ్రాంచైజీలకు నాయకత్వం వహించిన అనుభవం ఉందని, అది వారికి అదనపు బలమని పేర్కొన్నారు. "నేను చూసినంతలో శుభ్‌మన్ చాలా ఆసక్తికరంగా కనిపిస్తున్నాడు. నిలకడ, ప్రశాంతత వంటి మంచి లక్షణాలు అతనిలో ఉన్నాయి" అని ఐసీసీ వన్డే ర్యాంకింగ్స్‌లో అగ్రస్థానంలో ఉన్న గిల్‌ను ప్రశంసించారు.
శుభ్‌మన్ గిల్ విదేశీ గడ్డపై సరిగా ఆడటం లేదనే విమర్శలను రవిశాస్త్రి కొట్టిపారేశారు. "విదేశాల్లో పరుగులు చేయలేదని కొందరు ఎప్పుడూ అంటూనే ఉంటారు. కొన్నిసార్లు వాళ్లకు మీ రికార్డులు మీరే చూసుకోండి అని చెప్పాలనిపిస్తుంది. అతన్ని విదేశాల్లో ఆడనివ్వండి, కచ్చితంగా పరుగులు చేస్తాడు. అతను ఒక క్లాస్ ప్లేయర్" అని గిల్‌కు మద్దతుగా నిలిచారు.
గిల్ ఇప్పటికే వన్డేల్లో భారత జట్టుకు వైస్ కెప్టెన్‌గా వ్యవహరించాడని, జింబాబ్వేతో జరిగిన టీ20 సిరీస్‌కు కెప్టెన్సీ కూడా చేశాడని గుర్తు చేశారు. ఆ సిరీస్‌ను భారత్ 4-1 తేడాతో గెలుచుకోగా, గిల్ ఐదు ఇన్నింగ్స్‌లలో 125.92 స్ట్రైక్ రేట్‌తో 170 పరుగులు చేశాడు. "దేశం కోసం అతనికి ఇంకా పదేళ్ల క్రికెట్ భవిష్యత్తు ఉంది. ఏదో ఒక పర్యటనలో కచ్చితంగా సత్తా చాటుతాడని, గతంలో చేయని పరుగులన్నీ భర్తీ చేస్తాడని నేను నమ్ముతున్నాను" అని శాస్త్రి ధీమా వ్యక్తం చేశారు.
