అలా వేధించే దేశాలు ఏకాకులు అవుతాయి: చైనా అధ్యక్షుడి కీలక వ్యాఖ్యలు

ఇతరులను వేధించడం, ఆధిపత్యం చెలాయించాలనే ధోరణులను ప్రదర్శించే దేశాలు చివరికి ఒంటరిగా మిగిలిపోతాయని చైనా అధ్యక్షుడు జి జిన్‌పింగ్‌ వ్యాఖ్యానించారు. అమెరికా, చైనాల మధ్య వాణిజ్య ఒప్పందంలో కొంత పురోగతి కనిపించడం, సుంకాల విధింపునకు తాత్కాలికంగా విరామం ప్రకటించిన నేపథ్యంలో ఆయన ఈ వ్యాఖ్యలు చేయడం ప్రాధాన్యత సంతరించుకుంది.

బీజింగ్‌లో బ్రెజిల్, కొలంబియా, చిలీ దేశాధినేతలతో జరిగిన ఒక సమావేశంలో జిన్‌పింగ్ మాట్లాడుతూ, వాణిజ్య యుద్ధాల వల్ల ఎవరికీ ప్రయోజనం చేకూరదని, విజేతలు ఎవరూ ఉండరని అన్నారు. ప్రపంచ దేశాలన్నీ పరస్పరం సహకరించుకుంటూ కలిసి పనిచేసినప్పుడే ప్రపంచ శాంతి, సుస్థిరత సాధ్యమవుతాయని ఆయన అభిప్రాయపడ్డారు.

ఇటీవల అమెరికా, చైనా మధ్య జరిగిన చర్చలు ఫలవంతం కావడంతో, ఇరు దేశాలు కీలక నిర్ణయాలు తీసుకున్నాయి. వాణిజ్య వివాదాలను సామరస్యంగా పరిష్కరించుకోవడానికి, మరిన్ని చర్చలు జరిపేందుకు వీలుగా ఒకరి ఉత్పత్తులపై మరొకరు విధించుకున్న అదనపు సుంకాలను తాత్కాలికంగా ఉపసంహరించుకోవడానికి అంగీకరించాయి. ఈ మేరకు సోమవారం ఇరు దేశాల ప్రతినిధులు సుంకాల యుద్ధానికి 90 రోజుల పాటు విరామం ఇస్తున్నట్లు ప్రకటించారు.

ఈ ఒప్పందంలో భాగంగా, చైనా నుంచి దిగుమతి అయ్యే వస్తువులపై టారిఫ్‌ రేటును 115 శాతం తగ్గించామని, దీనితో మొత్తం సుంకం 145 శాతం నుంచి 30 శాతానికి పరిమితమైందని యూఎస్‌ వాణిజ్య ప్రతినిధి జేమిసన్‌ గ్రీర్‌ వెల్లడించారు. అదేవిధంగా, అమెరికా వస్తువులపై చైనా కూడా తన సుంకాన్ని అంతేస్థాయిలో తగ్గించడంతో, అక్కడ సుంకం 125% నుంచి 10 శాతానికి దిగివచ్చిందని జెనీవాలో గ్రీర్‌తో పాటు అమెరికా వాణిజ్య మంత్రి స్కాట్‌ బెసెంట్‌ తెలిపారు.