యుద్ధం వద్దు: సినీ నటి సంజనా గల్రానీ

భారతదేశం, పాకిస్తాన్ మధ్య ఉద్రిక్త వాతావరణం నెలకొన్న ప్రస్తుత తరుణంలో, పలువురు ప్రముఖులు తమ అభిప్రాయాలను వ్యక్తం చేస్తున్నారు. ఈ క్రమంలో, తెలుగు ప్రేక్షకులకు సుపరిచితురాలైన నటి సంజన గల్రానీ సోషల్ మీడియా వేదికగా చేసిన కొన్ని వ్యాఖ్యలు చర్చనీయాంశంగా మారాయి. 'ఆపరేషన్ సిందూర్' నేపథ్యంలో ఆమె శాంతియుత పరిష్కారాన్ని ఆకాంక్షిస్తూ, యుద్ధం వల్ల కలిగే నష్టాలపై తన ఆందోళనను వ్యక్తం చేశారు.

"నేను పూర్తి దేశభక్తురాలిని, కానీ అదే సమయంలో నేను సంపూర్ణ శాంతి ప్రేమికురాలిని. చిన్న లేదా పెద్ద యుద్ధం వచ్చే సూచనలు దేశ ప్రతిష్ఠకు మంచిది కాదు. ఇది భారతదేశ ఆర్థిక వ్యవస్థను ప్రభావితం చేస్తుంది, అంతర్జాతీయ పర్యాటకులపైనా ప్రభావం చూపవచ్చు. యుద్ధంలో పాల్గొన్న దేశానికి కలిగే నష్టం అపారమైనది. త్వరలోనే అంతా ప్రశాంతంగా ముగిసిపోతుందని నేను ఆశిస్తున్నాను. జై హింద్" అని పేర్కొన్నారు.

సంజన చేసిన ఈ వ్యాఖ్యలు సామాజిక మాధ్యమాల్లో వేగంగా వ్యాపించాయి. వీటిపై నెటిజన్ల నుంచి భిన్నమైన స్పందనలు వస్తున్నాయి. కొందరు ఆమె అభిప్రాయాన్ని సమర్థిస్తుండగా, మరికొందరు తీవ్రంగా విమర్శిస్తూ కామెంట్లు పెడుతున్నారు. దేశభక్తిని చాటుతూనే శాంతిని కోరుకోవడం సమంజసమే అయినా, ప్రస్తుత సున్నితమైన పరిస్థితుల్లో ఇటువంటి వ్యాఖ్యలు చేయడంపై కొందరు అభ్యంతరం వ్యక్తం చేస్తున్నారు.

కన్నడ చిత్ర పరిశ్రమకు చెందిన సంజన, 2005లో తరుణ్ హీరోగా నటించిన 'సోగ్గాడు' సినిమాతో తెలుగు తెరకు పరిచయమయ్యారు. ఆ తర్వాత ప్రభాస్ నటించిన 'బుజ్జిగాడు' చిత్రంలో సెకండ్ హీరోయిన్‌గా మంచి గుర్తింపు పొందారు. రాజశేఖర్ 'సత్యమేవ జయతే', శ్రీకాంత్ 'దుశ్శాసన', 'సర్దార్ గబ్బర్ సింగ్' వంటి పలు తెలుగు చిత్రాల్లో ఆమె నటించారు. కాగా, గతంలో సంజన డ్రగ్స్ కేసులో ఆరోపణలు ఎదుర్కొని, కొంతకాలం జైలు జీవితం కూడా గడిపిన విషయం తెలిసిందే.

వ్యక్తిగత జీవితంలో, సంజన 2020 లాక్‌డౌన్ సమయంలో బెంగళూరుకు చెందిన వైద్యుడు అజీజ్ పాషాను వివాహం చేసుకున్నారు. ఈ దంపతులకు 2022లో ఒక కుమారుడు జన్మించగా, ప్రస్తుతం ఆమె మరోసారి గర్భవతిగా ఉన్నట్లు సమాచారం.