"నేను రాక్షసుడ్ని చంపేశాను"... మాజీ డీజీపీ భార్య వీడియో కాల్!

కర్ణాటక మాజీ డీజీపీ ఓం ప్రకాశ్ (68) తన నివాసంలోనే దారుణ హత్యకు గురికావడం సంచలనం సృష్టించింది. బెంగళూరులోని హెచ్‌ఎస్‌ఆర్ లేఅవుట్‌లోని ఆయన నివాసంలోనే ఈ ఘోరం చోటుచేసుకుంది. ఓం ప్రకాశ్ భార్య పల్లవి, కుమార్తె కృతి ఈ ఘాతుకానికి పాల్పడినట్టు భావిస్తున్నారు. హత్య అనంతరం పల్లవి తన స్నేహితురాలికి వీడియో కాల్ చేసి, "నేను రాక్షసుడిని చంపేశాను" అని చెప్పినట్లు తెలిసింది. ఈ ఘటనకు సంబంధించి పోలీసులు పల్లవితో పాటు వారి కుమార్తె కృతిని అదుపులోకి తీసుకుని విచారణ చేపట్టారు.

కళ్లల్లో కారం, కత్తితో దాడి.. హత్య వెనుక కుటుంబ కలహాలు?

పోలీసుల ప్రాథమిక విచారణ ప్రకారం, ఆదివారం ఓం ప్రకాశ్, పల్లవిల మధ్య తీవ్ర స్థాయిలో వాగ్వాదం జరిగింది. ఈ క్రమంలో సహనం కోల్పోయిన పల్లవి, ముందుగా ఓం ప్రకాశ్ ముఖంపై కారం చల్లి, అనంతరం కత్తితో విచక్షణారహితంగా దాడి చేసి హత్య చేసినట్లు తెలుస్తోంది. వారి మూడు అంతస్తుల ఇంటి గ్రౌండ్ ఫ్లోర్‌లో రక్తపు మడుగులో పడి ఉన్న ఓం ప్రకాశ్ మృతదేహాన్ని గుర్తించారు.

ఈ దారుణ హత్య వెనుక దీర్ఘకాలంగా కొనసాగుతున్న కుటుంబ కలహాలు, ఆస్తి వివాదాలు (ముఖ్యంగా కర్ణాటకలోని దాండేలిలో ఉన్న భూ వివాదం) ప్రధాన కారణంగా పోలీసులు అనుమానిస్తున్నారు.

పల్లవి గత కొంతకాలంగా మానసిక సమస్యలతో (స్కిజోఫ్రెనియా) బాధపడుతున్నారని, చికిత్స తీసుకుంటున్నారని కూడా పోలీసు వర్గాలు వెల్లడించాయి. గతంలో కుటుంబ గొడవలపై ఫిర్యాదు చేసేందుకు స్థానిక పోలీస్ స్టేషన్‌కు వెళ్లి, తన ఫిర్యాదును సరిగా స్వీకరించలేదని ఆరోపిస్తూ అక్కడే నిరసనకు దిగినట్లు సమాచారం.

ఓం ప్రకాశ్ నేపథ్యం

బీహార్‌కు చెందిన ఓం ప్రకాశ్, 1981 బ్యాచ్ ఐపీఎస్ అధికారి. కర్ణాటక కేడర్‌లో అదనపు ఎస్పీగా కెరీర్ ప్రారంభించి, పలు జిల్లాల్లో ఎస్పీగా, లోకాయుక్త, అగ్నిమాపక శాఖల్లో ఉన్నత పదవులు నిర్వహించారు. 2015 మార్చి నుంచి 2017 మార్చి వరకు కర్ణాటక డీజీపీ, ఐజీపీగా బాధ్యతలు నిర్వర్తించి పదవీ విరమణ పొందారు.

ప్రస్తుతం ఈ హత్య కేసు రాష్ట్రవ్యాప్తంగా తీవ్ర సంచలనం రేపుతోంది. పోలీసులు పల్లవి, కృతిలను విచారిస్తున్నారు. పోస్ట్‌మార్టం నివేదిక, తదుపరి విచారణలో మరిన్ని కీలక విషయాలు వెలుగులోకి వచ్చే అవకాశం ఉందని అధికారులు తెలిపారు.