Vangalapudi Anitha: గతంలో టీటీడీ చైర్మన్ గా చేసిన వ్యక్తి ఇలా మాట్లాడడమేంటి?: హోంమంత్రి అనిత
- తిరుమలపై కొందరు అవాస్తవాలు ప్రచారం చేస్తున్నారన్న అనిత
- మత విద్వేషాలు రెచ్చగొట్టేందుకు ప్రయత్నిస్తున్నారని ఆగ్రహం
- లా అండ్ ఆర్డర్ విషయంలో ఎక్కడా రాజీపడబోమని స్పష్టీకరణ
రాష్ట్రంలో శాంతిభద్రతలకు విఘాతం కలిగించేందుకు కొన్ని శక్తులు ప్రయత్నిస్తున్నాయని, అటువంటి వారి పట్ల ప్రభుత్వం కఠినంగా వ్యవహరిస్తుందని హోంమంత్రి వంగలపూడి అనిత స్పష్టం చేశారు. ప్రజల మధ్య మత విద్వేషాలను రెచ్చగొట్టే దురుద్దేశంతో సాగుతున్న దుష్ప్రచారాలను సమర్థవంతంగా తిప్పికొడతామని ఆమె హెచ్చరించారు. మంగళవారం నాడు ఆమె మీడియా ప్రతినిధులతో మాట్లాడుతూ శాంతిభద్రతల పరిరక్షణకు ప్రభుత్వం తీసుకుంటున్న చర్యలను వివరించారు.
కొందరు వ్యక్తులు ఉద్దేశపూర్వకంగా మత ఘర్షణలు సృష్టించి, లా అండ్ ఆర్డర్ సమస్యలు తీసుకురావాలని ప్రయత్నిస్తున్నారని హోంమంత్రి ఆరోపించారు. ముఖ్యంగా తిరుమల తిరుపతి దేవస్థానం వంటి అత్యంత పవిత్రమైన, ప్రజల మనోభావాలతో ముడిపడి ఉన్న అంశాలపై అవాస్తవాలు ప్రచారం చేస్తున్నారని మండిపడ్డారు. గతంలో టీటీడీ చైర్మన్‌గా పనిచేసిన వ్యక్తి సైతం బాధ్యతారహితంగా, భక్తుల సెంటిమెంట్‌ను దెబ్బతీసేలా మాట్లాడటం సరికాదన్నారు. పింక్ డైమండ్ వంటి కట్టుకథలతో గతంలోనూ దుష్ప్రచారం చేశారని గుర్తుచేశారు. ప్రభుత్వానికి చెడ్డపేరు తెచ్చి, మత ఘర్షణలు సృష్టించాలనే దురాలోచనతోనే ఇటువంటి వ్యాఖ్యలు చేస్తున్నారని, వీటిలో ఎంతమాత్రం నిజం లేదని టీటీడీ ఈవో శ్యామలరావు సైతం స్పష్టం చేశారని తెలిపారు.
రాష్ట్రంలో కొన్నిచోట్ల ఉద్రిక్తతలు సృష్టించే ప్రయత్నాలు జరిగాయని హోంమంత్రి వెల్లడించారు. నరసన్నపేటలో దేవాలయంపై అన్యమత ప్రార్థనలు రాయడం, చర్చి వద్ద అభ్యంతరకర రాతలు రాయడం వంటి సంఘటనల వెనుక మత కల్లోలాలు సృష్టించాలనే స్పష్టమైన కుట్ర కనిపిస్తోందని అన్నారు. కొందరు పాస్టర్ల ముసుగులో రెచ్చగొట్టే వ్యాఖ్యలు చేస్తున్నారని, అయితే ప్రభుత్వం సంయమనంతో వ్యవహరిస్తూ పోలీస్ శాఖ ద్వారా పరిస్థితిని అదుపులో ఉంచిందని వివరించారు. క్రిమినల్ మనస్తత్వం కలిగిన వారు రాజకీయాల్లో ఉంటే ఎటువంటి పరిణామాలు చోటుచేసుకుంటాయో, అటువంటివి పునరావృతం చేసేందుకు కొందరు ప్రయత్నిస్తున్నారని, కానీ ప్రభుత్వం పూర్తి అప్రమత్తతతో ఉందని, అలాంటి ప్రయత్నాలను ఆదిలోనే అడ్డుకుంటామని ధీమా వ్యక్తం చేశారు.
శాంతిభద్రతల పరిరక్షణ విషయంలో ఎక్కడా రాజీ పడేది లేదని, గతంలో ఫ్యాక్షనిజం, నక్సలిజం వంటి తీవ్ర సమస్యలను అదుపు చేసిన ఘనత చంద్రబాబు నాయుడు ప్రభుత్వానికి ఉందని గుర్తుచేశారు. గుజరాత్, మణిపూర్ వంటి ఘటనలు రాష్ట్రంలో పునరావృతం కాకుండా పటిష్టమైన చర్యలు తీసుకుంటున్నామని హామీ ఇచ్చారు. ఉత్తరాంధ్రలో నేరాలు పెరుగుతున్నాయన్న ఆరోపణలను ఖండించారు. నేరాల నియంత్రణకు సీసీటీవీ కెమెరాలు, డ్రోన్ల వంటి సాంకేతికతను వినియోగిస్తున్నామని, ఏ సంఘటన జరిగినా 24 గంటల్లో నిందితులను పట్టుకుంటున్నామని, పోలీస్ వ్యవస్థ సమర్థవంతంగా పనిచేస్తోందని తెలిపారు.
సిట్ దర్యాప్తులపై అడిగిన ప్రశ్నకు బదులిస్తూ, విచారణ పూర్తయిన వెంటనే ఆధారాలతో సహా దోషులపై చర్యలు తీసుకుంటామని హోంమంత్రి స్పష్టం చేశారు. తొందరపడి చర్యలు తీసుకుని, నిందితులు కోర్టుల నుంచి తప్పించుకునే అవకాశం ఇవ్వబోమని, పక్కా సాక్ష్యాధారాలతో ముందుకెళ్తామని తెలిపారు. తప్పు చేసిన వారు ఎవరైనా చట్టం నుంచి తప్పించుకోలేరని ఆమె గట్టిగా హెచ్చరించారు. దర్యాప్తు సంస్థల విచారణలో జోక్యం చేసుకోవడం సరికాదని, విచారణ పూర్తి కాగానే వాస్తవాలు వెలుగులోకి వస్తాయని, దోషులు శిక్ష అనుభవిస్తారని వంగలపూడి అనిత పేర్కొన్నారు.
