ఈ సినిమాకి నా కుమారుడ్ని కూడా తీసుకెళ్లను: నాని

క్రైమ్ థ్రిల్లర్ చిత్రం 'హిట్ 3' ప్రమోషన్స్‌లో భాగంగా హీరో నాని మీడియా ముందు కీలక వ్యాఖ్యలు చేశారు. నాని, శ్రీనిధి శెట్టి హీరో హీరోయిన్లుగా నటించిన ఈ చిత్రం మే 1న ప్రేక్షకుల ముందుకు రానుంది. ఈ క్రమంలో సోమవారం విశాఖపట్నంలో ట్రైలర్ లాంచ్ కార్యక్రమాన్ని నిర్వహించారు. సాయంత్రం హైదరాబాద్‌లో ఈ చిత్రంపై మీడియా సమావేశం ఏర్పాటు చేశారు.

ఈ సందర్భంగా మీడియా అడిగిన ప్రశ్నలకు నాని ఆసక్తికరంగా సమాధానాలు ఇచ్చారు. ఈ మూవీ క్రైమ్ థ్రిల్లర్ కావున పిల్లలకు చూపించవద్దని చెప్పడం తన బాధ్యత అని అన్నారు. తన కుమారుడిని కూడా ఈ సినిమాకు తీసుకువెళ్లనని పేర్కొన్నారు. ఈ సినిమా కారణంగా ఓ వర్గం ప్రేక్షకులు తగ్గితే మరో వర్గం ప్రేక్షకులు పెరుగుతారని అన్నారు.

దసరా మూవీలో కూడా వైలెన్స్ ఉందని, అయినా బ్లాక్‌బస్టర్ అయిన విషయాన్ని నాని గుర్తు చేశారు. ఈ సినిమా ట్రైలర్ చూస్తే వైలెన్స్ అనిపించవచ్చని కానీ సినిమా చూసేటప్పుడు ఇంత వైలెన్స్ ఏంటనే ఆలోచన రాదని, ప్రేక్షకులు కథలో లీనమవుతారని నాని చెప్పుకొచ్చారు.