సైఫ్ త్వరగా కోలుకోవాలని ప్రార్థిస్తున్నా: చిరంజీవి

సైఫ్ అలీఖాన్ పై దాడి విషయం తెలిసి ఎంతగానో కలత చెందానని మెగాస్టార్ చిరంజీవి పేర్కొన్నారు. ఆయన త్వరగా కోలుకోవాలని ప్రార్థిస్తున్నట్లు తెలిపారు. బుధవారం రాత్రి ముంబైలోని సైఫ్ అలీఖాన్ నివాసంలో ఓ దుండగుడు చోరీకి ప్రయత్నించాడు. ఈ క్రమంలోనే సైఫ్ అలీఖాన్ పై కత్తితో దాడి చేశాడు. దీంతో సైఫ్ తీవ్రంగా గాయపడ్డారని, కుటుంబ సభ్యులు ఆయనను వెంటనే లీలావతి ఆసుపత్రికి తరలించారని సమాచారం. ఈ విషయం తెలిసి టాలీవుడ్ హీరోలు ఆందోళన వ్యక్తం చేశారు. జూనియర్ ఎన్టీఆర్ స్పందిస్తూ.. సైఫ్ సర్ పై దాడి విషయం తెలిసి షాక్ అయినట్లు చెప్పారు.

సైఫ్ అలీఖాన్ భార్య, నటి కరీనా కపూర్ టీమ్ ఈ ఘటనపై స్పందించింది. సోషల్ మీడియాలో ఓ ప్రకటన విడుదల చేసింది. ‘బుధవారం రాత్రి సైఫ్, కరీనా నివాసంలో చోరీ యత్నం జరిగింది. దుండగుడి దాడిలో సైఫ్ చేతికి గాయమైంది. ప్రస్తుతం ఆయన ఆసుపత్రిలో చికిత్స పొందుతున్నారు. మిగిలిన కుటుంబ సభ్యులంతా క్షేమంగా ఉన్నారు. ఈ క్లిష్ట సమయంలో మీడియా, అభిమానులు సంయమనంతో వ్యవహరించాలని కోరుకుంటున్నాం. ఎలాంటి వదంతులు వ్యాప్తి చేయొద్దు. పోలీసులు ఇప్పటికే దర్యాప్తు మొదలుపెట్టారు’’ అని కరీనా టీమ్ పేర్కొంది.