PV Sindhu: ‘ఆల్ ఇంగ్లండ్ ఓపెన్’ నుంచి స్టార్ షట్లర్ పీవీ సింధు నిష్క్రమణ

ప్రతిష్టాత్మక ఆల్ ఇంగ్లండ్ ఓపెన్ బ్యాడ్మింటన్ ఛాంపియన్‌షిప్ 2024లో భారత అగ్రశ్రేణి షట్లర్ పీవీ సింధు గురువారం త్వరగానే నిష్క్రమించింది. బర్మింగ్‌హామ్‌లోని యుటిలిటా ఎరీనా వేదికగా రౌండ్‌-16 మ్యాచ్‌లో ఓడిపోయింది. చైనాకు చెందిన ప్రపంచ నంబర్ వన్ షట్లర్ అన్‌సే యంగ్ చేతిలో 21-19, 21-11 తేడాతో వరుస సెట్లలో సింధు ఓటమిపాలయ్యింది. 42 నిమిషాల్లోనే ఈ మ్యాచ్ ముగిసింది. తొలి సెట్‌లో హోరాహోరీగా తలపడిన సింధు.. రెండవ సెట్‌లో ఆ స్థాయి ప్రదర్శన చేయలేకపోయింది. అంతకుముందు రౌండ్‌-32లో జర్మనీకి చెందిన షట్లర్ వోన్నే లీపై సింధు విజయం సాధించిన విషయం తెలిసిందే. 2023 సీజన్‌లో పేలవ ప్రదర్శన చేసిన సింధు ఇటీవలే ముగిసిన ప్యారిస్ ఓపెన్ 2024లో క్వార్టర్-ఫైనల్ వరకు చేరుకొని ఫర్వాలేదనిపించింది.

సింధు ఓటమితో ‘ఆల్ ఇంగ్లండ్ ఓపెన్ బ్యాడ్మింటన్ ఛాంపియన్‌షిప్’ సింగిల్స్ విభాగంలో ఆశలన్నీ స్టార్ షట్లర్ లక్ష్య సేన్‌పైనే ఉన్నాయి. రౌండ్‌-16లో నాల్గవ సీడ్ ప్లేయర్ అండర్స్ ఆంటోన్‌పై లక్ష్యసేన్ పోరాడి విజయం సాధించిన విషయం తెలిసిందే. మరోవైపు డబుల్స్‌ విభాగంలో భారత టాప్ జోడీ సాత్విక్‌ - చిరాగ్ జోడి పురుషుల రౌండ్‌-16లో ఇండోనేషియా జంట మహమ్మద్ షోహిబుల్ ఫిక్రి-బగాస్ మౌలానాతో తలపడనుంది. ఇక మహిళల డబుల్స్ రెండో రౌండ్‌లో తనీషా క్రాస్టో-అశ్విని పొన్నప్ప జోడీ జియాన్-జెంగ్ యూతో పోటీ పడనుంది.