క్రైస్తవ మత సంప్రదాయం ప్రకారం రాజారెడ్డి-ప్రియా పెళ్లి... ఫొటోలు పంచుకున్న షర్మిల

ఏపీ పీసీసీ చీఫ్ షర్మిల, ప్రముఖ మత బోధకుడు బ్రదర్ అనిల్ కుమార్ దంపతుల తనయుడు రాజారెడ్డి ఓ ఇంటివాడయ్యాడు. రాజారెడ్డి వివాహం ప్రియా అట్లూరితో రాజస్థాన్ లోని జోథ్ పూర్ లో ఘనంగా జరిగింది. క్రైస్తవ మత సంప్రదాయం ప్రకారం జరిగిన ఈ వివాహ వేడుక ఫొటోలను షర్మిల సోషల్ మీడియాలో పంచుకున్నారు. 

"ఓ తల్లిగా నా జీవితంలో ఇది మరొక సంతోషకరమైన ఘట్టం. వేచి చూసిన ఆ క్షణాలు ఎట్టకేలకు వచ్చాయి. సర్వశక్తిమంతుడైన ఆ భగవంతుడి అంతులేని కృప, సన్నిహితుల దీవెనలు, శుభాకాంక్షలతో ఈ శుభకార్యం జరిగింది. నా బిడ్డ తన మనసుకు నచ్చిన అమ్మాయిని పెళ్లాడాడు. కొన్ని అద్భుతమైన క్షణాలు ఎప్పటికీ పదిలంగా ఉండిపోతాయి" అని షర్మిల పేర్కొన్నారు.