Mahesh Babu: 'గుంటూరు కారం' నుంచి మహేశ్ మాస్ స్టెప్ పోస్టర్!

మహేశ్ బాబు మాస్ యాక్షన్ మూవీ చేయక చాలా కాలమే అయింది. పక్కా మాస్ కంటెంట్ తో ఆయన నుంచి ఒక సినిమా ఎప్పుడు వస్తుందా అని అభిమానులు చాలా కాలంగా ఎదురుచూస్తున్నారు. ఈ నేపథ్యంలోనే ఆయనను త్రివిక్రమ్ సెట్స్ పైకి తీసుకుని వెళ్లాడు. ఈ ఇద్దరి కాంబినేషన్ లో సినిమా రాక చాలా కాలం కావడంతో మరింత ఆసక్తిని కనబరిచారు. 

అయితే ఈ సినిమాకి త్రివిక్రమ్ 'గుంటూరు కారం' అనే టైటిల్ ను సెట్ చేశాడు. నిజానికి ఈ మధ్య వచ్చిన త్రివిక్రమ్ సినిమాలను చూసుకుంటే, ఇది పూర్తిగా భిన్నమైన టైటిల్. మహేశ్ బాబు కూడా ఇలాంటి మాస్ టైటిల్ తో ఈ మధ్య రాలేదు. దాంతో సహజంగానే ఈ సినిమా ఒక్కసారిగా అంచనాలు పెంచేసింది. హారిక - హాసిని బ్యానర్ పై ఈ సంక్రాంతి కానుకగా జనవరి 12వ తేదీన విడుదల కానుంది. 

తాజాగా ఈ సినిమా నుంచి మహేశ్ బాబు కొత్త పోస్టర్ ను రిలీజ్ చేశారు. మహేశ్ పై చిత్రీకరించిన మాస్ సాంగ్ కి సంబంధించిన పోస్టర్ ఇది. ఈ పోస్టర్ ను చూస్తుంటే 'పోకిరి'లోని మహేశ్ బాబు లుక్ గుర్తుకు రాకుండా ఉండదు. తమన్ సంగీతాన్ని అందించిన ఈ సినిమాలో, మహేశ్ సరసన శ్రీలీల - మీనాక్షి చౌదరి సందడి చేయనున్నారు.