Telangana: రేపు తెలంగాణ ఎన్నికల నోటిఫికేషన్... రేపటి నుంచి 10వ తేదీ వరకు నామినేషన్ల స్వీకరణ
- 13వ తేదీ వరకు నామినేషన్ల పరిశీలన
- నామినేషన్ల ఉపసంహరణ గడువు నవంబర్ 15
- ఉదయం పది గంటల నుంచి మధ్యాహ్నం మూడు గంటల వరకు నామినేషన్ల స్వీకరణ
తెలంగాణ అసెంబ్లీ ఎన్నికలకు రేపు (నవంబర్ 3) నోటిఫికేషన్ రానుంది. ఈ నెల 10వ తేదీ వరకు నామినేషన్లను స్వీకరిస్తారు. 13వ తేదీ వరకు నామినేషన్లను పరిశీలిస్తారు. నామినేషన్ల ఉపసంహరణకు నవంబర్ 15వ తేదీ వరకు గడువు ఉంటుంది. ఈ నెల 30వ తేదీన తెలంగాణలో పోలింగ్ ఉంటుంది. డిసెంబర్ 3న కౌంటింగ్ జరుగుతుంది. శుక్రవారం ఉదయం పది గంటల నుంచి అన్ని నియోజకవర్గాల్లో నామినేషన్లను రిటర్నింగ్ అధికారుల వద్ద దాఖలు చేయవచ్చు. మధ్యాహ్నం మూడు గంటల వరకు నామినేషన్ల స్వీకరణ ఉంటుంది. ఆదివారం 5న సెలవు దినం కావడంతో ఆ ఒక్కరోజు మాత్రమే నామినేషన్లను స్వీకరించరు.
సీఈసీ వీడియో సమావేశం
తెలంగాణ సహా ఐదు రాష్ట్రాల అసెంబ్లీ ఎన్నికల నేపథ్యంలో కేంద్ర ఎన్నికల సంఘం వీడియో సమావేశం నిర్వహించింది. అంతర్రాష్ట్ర సరిహద్దు అంశాలపై ఢిల్లీ నుంచి సీఈసీ సమావేశం నిర్వహించింది. ఐదు రాష్ట్రాల ఎన్నికలకు సంబంధించి అంతర్రాష్ట్ర సరిహద్దు అంశాలపై సమీక్షించారు. ప్రధాన ఎన్నికల కమిషనర్ రాజీవ్ కుమార్ నేతృత్వంలో ఈ సమావేశం జరిగింది. సమావేశంలో ఆయా రాష్ట్రాల సీఎస్‌లు, డీజీపీలు, రాష్ట్ర ఎన్నికల ప్రధాన అధికారులు పాల్గొన్నారు.
