healthy heart: గుండె ఆరోగ్యం కోసం ప్రముఖ హృద్రోగ నిపుణుడి టిప్స్!
- రోజూ 8,000 అడుగులు నడవాలి
- 30 ఏళ్లు దాటితే ప్రివెంటివ్ హెల్త్ చెక్ అవసరం
- రోజూ 15 నిమిషాలు యోగా చేస్తే అద్భుత ఫలితాలు
- ఏడాదికోసారి ముందస్తు పరీక్షలు చేయించుకోవాలంటున్న డా. దేవిశెట్టి
కిడ్నీలు, ఊపిరితిత్తుల పనితీరు దెబ్బతింటే కొన్నేళ్లపాటు జీవించొచ్చు. కానీ, గుండెకు ఆపద వస్తే ఎక్కువ కాలం జీవించడం కష్టం. అది హార్ట్ ఎటాక్ గా మారితే ప్రాణానికి ప్రమాదం ఏర్పడుతుంది. బలమైన గుండె కోసం ఏం చేయాలన్నది నారాయణ హెల్త్ చైర్మర్, ఎండీ డాక్టర్ దేవి ప్రసాద్ శెట్టి ఓ వార్తా సంస్థకు వివరించారు. ఇప్పుడు ఆ వివరాలను ఆయన మాటల ద్వారానే తెలుసుకుందాం.
‘‘గుండె బద్దలయ్యే వరకు వేచి చూడొద్దు. సమస్య రాక ముందే వైద్యుడిని సంప్రదించాలి. దీన్ని నివారణ విధానమని చెబుతాం. 30 ఏళ్లు దాటిన ప్రతి ఒక్కరూ ప్రివెంటివ్ చెకప్ కోసం వెళ్లాలి. ముఖ్యంగా పరుగు పందెం, ఫుట్ బాల్ తదితర కఠిన శ్రమతో కూడుకున్న క్రీడల్లో పాల్గొనే ముందు స్క్రీనింగ్ అవసరం. గుండె గురించి పూర్తి స్థాయి పరిశీలన చేయించుకోవాలి. వయోజనుల్లో 15 శాతం మందిలో గుండె జబ్బులు ఉంటున్నాయి. వీరిలో 50 శాతం ఇస్చెమియాతో బాధపడుతున్నారు. అంటే హార్ట్ ఎటాక్ వచ్చినా కానీ అది వారికి తెలియదు.
ఉదయమే పరగడుపుతో ఏదైనా డయాగ్నోస్టిక్స్ లేదా హాస్పిటల్ కు వెళ్లి రక్త నమూనా ఇవ్వండి. బ్లడ్ షుగర్, థైరాయిడ్, సీబీపీ తదితర ప్రాథమిక పరీక్షలు అన్నీ చేయించుకోవాలి. ఆ తర్వాత ఈసీజీ తీయించుకోవాలి. ఛాతీ ఎక్స్ రే, పొట్టకు అల్ట్రా సౌండ్ పరీక్షలు చేయించుకోవాలి. 40 ఏళ్ల తర్వాత గుండెకు సంబంధించి క్యాల్షియం స్కోరు టెస్ట్ చేయించుకోవాలి. అది పాజిటివ్ వస్తే సీటీ యాంజియో చేయించుకోవాలి. ఇవన్నీ చేయించుకుంటే, వచ్చే 365 రోజుల్లో ఆరోగ్యపరంగా ఎలాంటి పెద్ద విపత్తు రాదని గ్యారంటీగా చెప్పవచ్చు’’ అని దేవి ప్రసాద్ శెట్టి వివరించారు.
