Chandrayaan-3: చంద్రుడిపై రోవర్ అడుగుపెడుతున్న దృశ్యం.. వీడియో ఇదిగో!

చందమామపై ప్రస్తుతం పలు పరిశోధనలు చేస్తున్న ప్రజ్ఞాన్ రోవర్ కు సంబంధించి కీలక వీడియోను ఇస్రో ట్వీట్ చేసింది. ఈ నెల 23న విక్రమ్ ల్యాండర్ చంద్రుడి ఉపరితలంపై విజయవంతంగా ల్యాండ్ అయిన విషయం తెలిసిందే. సాయంత్రం 6:04 నిమిషాలకు విక్రమ్ జాబిల్లిపై ల్యాండ్ కాగా.. రాత్రి పది గంటల ప్రాంతంలో రోవర్ బయటకు వచ్చింది. విక్రమ్ ల్యాండర్ నుంచి రోవర్ బయటకు వస్తున్న వీడియోను ఇస్రో తాజాగా విడుదల చేసింది. ట్విట్టర్లో ఈ వీడియోను షేర్ చేసింది. ఇందులో ల్యాండర్ నుంచి రోవర్ ప్రజ్ఞాన్ నెమ్మదిగా బయటకు వచ్చి, ట్రాక్ పైన ప్రయాణిస్తూ జాబిల్లిపై అడుగుపెట్టడం కనిపిస్తోంది.

చంద్రయాన్-2 ఆర్బిటర్ కు సంబంధించి శుక్రవారం ఉదయం చేసిన ట్వీట్ ను ఇస్రో తొలగించింది. దీనికి కారణాలను మాత్రం అధికారులు వెల్లడించలేదు. ఇస్రో తొలగించిన ఆ ట్వీట్ లో ఏముందంటే.. చంద్రయాన్-3 ల్యాండర్ విక్రమ్ ను చంద్రయాన్-2 ఆర్బిటర్ ఫొటో తీసిందని ఇస్రో పేర్కొంది. ‘నువ్వెప్పుడూ నా నిఘా పరిధిలోనే ఉంటావు’ అంటూ క్యాప్షన్ జతచేసి ఈ ఫొటోను ట్విట్టర్ లో పెట్టింది. ఆపై కాసేపటికే ఈ పోస్టును తొలగించింది.