Kidnap: ఆకివీడులో యువకుడి బరితెగింపు.. ఇంట్లోకి చొరబడి తాత, తల్లిపై దాడిచేసి యువతి కిడ్నాప్

పశ్చిమ గోదావరి జిల్లా ఆకివీడు మండలం సిద్ధాపురం గ్రామంలో దారుణం జరిగింది. ఓ ఇంట్లోకి చొరబడిన యువకుడు.. వృద్ధుడు, అతడి కుమార్తెపై దాడి చేసి యువతిని బలవంతంగా తీసుకెళ్లాడు. పోలీసుల కథనం ప్రకారం.. గ్రామంలో వృద్ధ ముస్లిం దంపతులు నివసిస్తున్నారు. ఈ క్రమంలో వృద్ధ మహిళ అనారోగ్యానికి గురికావడంతో తణుకు ఆసుపత్రిలో చేర్చారు. ఏలూరులో నివసిస్తున్న వారి కుమార్తె విషయం తెలిసి తన కూతురు (20)తో కలిసి గ్రామానికి చేరుకుంది. గతంలో యువతి వెంట పడిన అదే గ్రామానికి చెందిన షేక్ ఇమ్రాన్‌ ఆమె గ్రామానికి వచ్చినట్టు తెలిసింది. 

నిన్న తెల్లవారుజామున ఆమె ఇంటికి వెళ్లి బయట నిద్రిస్తున్న ఆమె తాత తలపై ఇనుపరాడ్డుతో మోదాడు. అతడి కేకలు విని బయటకు వచ్చిన అతడి కుమార్తెపైనా దాడిచేశాడు. తనతో రాకుంటే తాతను, తల్లిని చంపేస్తానని బెదిరించి యువతిని బైక్‌పై ఎక్కించుకుని తీసుకెళ్లాడు. తీవ్రంగా గాయపడిన వృద్ధుడు, ఆమె కుమార్తె భీమవరంలోని ఓ ప్రైవేటు ఆసుపత్రిలో చికిత్స పొందుతున్నారు. వృద్ధుడి తలకు 50 కుట్లు పడ్డాయని, అతడి పరిస్థితి విషమంగా ఉందని వైద్యులు పేర్కొన్నారు. కేసు నమోదు చేసుకున్న పోలీసులు నిందితుడి కోసం గాలిస్తున్నారు.