Guntur District: సులభంగా డబ్బు సంపాదించేందుకు యువతులతో నగ్న పూజలు.. పూజారి సహా 12 మంది అరెస్ట్

సులభంగా డబ్బు సంపాదించేందుకు యువతులతో నగ్నంగా క్షుద్రపూజలు చేయించిన ముఠాను గుంటూరు పోలీసులు అదుపులోకి తీసుకున్నారు. పోలీసుల కథనం ప్రకారం.. తాటికొండ మండలం పొన్నేకల్లుకు చెందిన పూజారి నాగేశ్వరరావు పూజలు చేస్తూ ఉంటాడు. వ్యాపారంలో నష్టపోయిన చిలకలూరిపేటకు చెందిన అరవింద అనే మహిళకు సోషల్ మీడియా ద్వారా అతను పరిచయమయ్యాడు.

వ్యాపారంలో నష్టపోయిన అరవింద తన బాధలు నాగేశ్వరరావుకు చెప్పుకుంది. గుప్త నిధులు కనిపెట్టడం ద్వారా సులభంగా డబ్బు సంపాదించవచ్చని, అందుకు యువతలతో నగ్నంగా క్షుద్రపూజలు చేయాల్సి ఉంటుందని పూజారి ఆమెకు చెప్పాడు. దీంతో అమ్మాయిల కోసం ఇద్దరూ గాలించారు. పూజల్లో నగ్నంగా కూర్చుంటే లక్ష రూపాయలు ఇస్తామని ఇద్దరూ కలిసి నాగేంద్ర అనే వ్యక్తిని ఆశ్రయించారు.

దీంతో నాగేంద్ర.. స్నేహితుడు సురేశ్‌తో కలిసి నంద్యాల జిల్లాలోని పేద కుటుంబాలకు చెందిన ఇద్దరు యువతులకు డబ్బులు ఆశగా చూపి ఒప్పించి తీసుకొచ్చారు. అనంతరం పూజారి వారిని నగ్నంగా కూర్చోబెట్టి పూజలు నిర్వహించాడు. ఆ తర్వాత యువతులపై పూజరి, అతడి అనుచరులు లైంగిక వేధింపులకు పాల్పడ్డారు. 

వారు ఎదురు తిరగడంతో శనివారం కారులో ఎక్కించుకుని గుంటూరు వైపు బయలుదేరారు. కారు గోరంట్ల సమీపంలోకి రాగానే బాధిత యువతులు తప్పించుకుని దిశ యాప్ ద్వారా పోలీసులను ఆశ్రయించారు. వెంటనే అప్రమత్తమైన నల్లపాడు పోలీసులు ఘటనా స్థలానికి చేరుకుని పూజారి, అతడి అనుచరులు సహా మొత్తం 12 మందిని అదుపులోకి తీసుకున్నారు. కేసు నమోదు చేసి దర్యాప్తు చేస్తున్నారు.