'విరూపాక్ష' విషయంలో నేనిచ్చే హామీ ఇదే: సాయితేజ్

సాయితేజ్ హీరోగా హారర్ థ్రిల్లర్ నేపథ్యంలో 'విరూపాక్ష' సినిమా రూపొందింది. బీవీఎస్ఎన్ ప్రసాద్ - సుకుమార్ నిర్మించిన ఈ సినిమా, రేపు ప్రేక్షకుల ముందుకు రానుంది. ఈ నేపథ్యంలో ఈ సినిమా టీమ్ ప్రీ రిలీజ్ ప్రెస్ మీట్ ను నిర్వహించింది. దర్శకనిర్మాతలు .. సాయితేజ్ .. సంయుక్త .. సోనియా సింగ్ ఇందులో పాల్గొన్నారు. 

ఈ వేదికపై సాయితేజ్ మాట్లాడుతూ .. "ప్రమాదం తరువాత నేను చేసిన సినిమా ఇది. మళ్లీ కెమెరా ముందుకు వచ్చినప్పుడు కొత్తగా నేర్చుకుంటున్నట్టుగా అనిపించింది. ఈ సినిమా కోసం మేమందరం కూడా ఇష్టంతో కష్టపడ్డాం. థియేటర్ కి వచ్చిన వాళ్లంతా కూడా అదే మాట చెబుతారు. టికెట్ రేటుకి తగిన ఎంటర్టయిన్ మెంట్ ను ఈ సినిమా అందిస్తుందని నేను హామీ ఇస్తున్నాను" అన్నాడు. 

"ఇంతవరకూ ఈ తరహా జోనర్లో బ్లాక్ బస్టర్ హిట్ సినిమాలే ఎక్కువగా వచ్చాయి. అలాంటి జోనర్లోనే ఈ సినిమా వస్తుందని నేను చెప్పగలను. ఈ సినిమాను థియేటర్స్ లో మీ స్నేహితులతో .. మీ కుటుంబ సభ్యులతో కలిసి చూడండి. తప్పకుండా ఎంజాయ్ చేస్తారు .. అందులో ఎలాంటి సందేహం లేదు" అని చెప్పుకొచ్చాడు.