KGF2: హిందీలో అత్యధిక వసూళ్లు రాబట్టిన రెండో చిత్రంగా 'కేజీఎఫ్2'.. తొలి స్థానంలో ఏ సినిమా ఉందంటే..?

కన్నడ స్టార్ యశ్, సెన్సేషనల్ డైరెక్టర్ ప్రశాంత్ నీల్ కాంబినేషన్ లో వచ్చిన 'కేజీఎఫ్2' చిత్రం రికార్డుల మోత మోగిస్తోంది. విడుదలైన అన్ని భాషల్లో (కన్నడ, తెలుగు, తమిళ, మలయాళ, హిందీ) భారీ వసూళ్లను రాబట్టింది. ఈ క్రమంలో హిందీలో అరుదైన ఘనతను సాధించింది.

జీవితకాల కలెక్షన్లలో ఆమిర్ ఖాన్ చిత్రం 'దంగల్'ను 'కేజీఎఫ్2' అధిగమించింది. 'దంగల్' చిత్రం లైఫ్ టైమ్ రన్ లో రూ. 387.40 కోట్లను వసూలు చేయగా... కేవలం 22 రోజుల్లోనే ఆ రికార్డును 'కేజీఎఫ్2' బద్దలు కొట్టింది. హిందీలో మే 5 వరకు 'కేజీఎఫ్2' రూ. 391.65 కోట్లను వసూలు చేసింది. ఈరోజు ఆ మొత్తం రూ. 400 కోట్లను దాటే అవకాశం ఉందని ప్రముఖ బాలీవుడ్ ట్రేడ్ అనలిస్ట్ తరణ్ ఆదర్శ్ వెల్లడించారు. మరో ట్రేడ్ అనలిస్ట్ రమేశ్ బాలా ట్విట్టర్ ద్వారా స్పందిస్తూ... 'కేజీఎఫ్2' ఈ రోజు రూ. 400 కోట్ల క్లబ్ లో చేరిందని చెప్పారు. 

హిందీలో అత్యధిక వసూళ్లను రాబట్టిన చిత్రాల జాబితాలో 'బాహుబలి2' తొలి స్థానంలో ఉంది. ఇప్పటి వరకు ఈ చిత్రం హిందీ వర్షన్ రూ. 511.30 కోట్లను వసూలు చేసింది. ఆసక్తికరమైన విషయం ఏమిటంటే హిందీలో ఇప్పటి వరకు కేవలం రెండు చిత్రాలు మాత్రమే రూ. 400 కోట్లకు పైగా వసూళ్లను సాధించాయి. ఆ రెండూ దక్షిణాది చిత్రాలే (బాహుబలి2, కేజీఎఫ్2) కావడం గర్వకారణం.