Vdivelu: స్టార్ హీరోలకు నో చెప్పిన ప్రభుదేవా .. వడివేలు కోసం రంగంలోకి దిగాడు!

తమిళంలో స్టార్ కమెడియన్ గా ఒక వెలుగు వెలిగిన 'వడివేలు' గురించి తెలుగు ప్రేక్షకులకు కూడా బాగా తెలుసు. చిన్నపాటి కమెడియన్ గా తన ప్రయాణాన్ని మొదలుపెట్టిన ఆయన, ఆ తరువాత హీరో స్థాయికి ఎదిగారు. తమిళంలో ఆయన పాత్రలకి ఇక్కడ ఎక్కువగా బ్రహ్మానందం డబ్బింగ్ చెప్పేవారు. వడివేలు ఇక్కడి ప్రేక్షకులకు కనెక్ట్ కావడానికి అది కూడా ఓ కారణమే!  

అలాంటి వడివేలు బాగా పాప్యులారిటీ వచ్చిన తరువాత రాజకీయాల్లో కుదురుకోవడానికి ప్రయత్నించారు. ఆ సమయంలో స్టార్ హీరోలపై ఆయన చేసిన విమర్శలు సినిమాల్లో అవకాశాలు లేకుండా చేశాయి. వడివేలు కళ్లు తెరిచేసరికి చాలా ఆలస్యమైపోయింది.  ఇప్పుడు ఆయన హీరోగా 'నాయ్ శేఖర్' అనే సినిమా చేస్తున్నాడు.

ఈ సినిమాకి సూరజ్ దర్శకత్వం వహిస్తున్నాడు. లైకా ప్రొడక్షన్స్ వారు ఈ సినిమాను నిర్మిస్తున్నారు. కామెడీ టచ్ తోనే ఈ కథ నడుస్తుంది. ఈ సినిమాలోని ఒక పాటకి ప్రభుదేవా కొరియోగ్రఫీని అందిస్తున్నాడు. డాన్స్ మాస్టర్ గా చేయడానికి స్టార్ హీరోలకే నో చెబుతూ వస్తున్న ప్రభుదేవా, వడివేలుతో ఉన్న సాన్నిహిత్యంతోనే అంగీకరించాడని అంటున్నారు.