సంపూ హీరోగా 'మిస్టర్ బెగ్గర్'

సంపూర్ణేశ్ బాబు హాస్యరస ప్రధానమైన కథలను వరుసగా చేస్తూ వస్తున్నాడు. 'కొబ్బరి మట్ట' సినిమాతో సక్సెస్ ను అందుకున్న ఆయన, ఇటీవల వచ్చిన 'క్యాలీ ఫ్లవర్' సినిమా ద్వారా తనదైన స్టయిల్లో ప్రేక్షకులను మరోసారి నవ్వించాడు. ఇక ఈ ఏడాది కూడా తనదైన మార్కుతో నాన్ స్టాప్ గా నవ్వించడానికి ఆయన రెడీ అవుతున్నాడు.

విభిన్నమైన కథాకథనాలతో కూడిన ఒక సినిమాను గురురాజ్ - కార్తీక్ నిర్మిస్తున్నారు. ఈ సినిమా ద్వారా దర్శకుడిగా జనార్దన్ పరిచయమవుతున్నాడు. రోహిత్ సంగీతాన్ని సమకూర్చుతున్న ఈ సినిమాకి, 'మిస్టర్ బెగ్గర్' అనే టైటిల్ ను సెట్ చేశారు. తాజాగా ఈ టైటిల్ తో కూడిన సంపూ ఫస్టు లుక్ పోస్టర్ ను విడుదల చేశారు.

'మిస్టర్ బెగ్గర్' గా కూడా సంపూ చాలా స్టైలిష్ లుక్ తో కనిపిస్తున్నాడు. 'వీడు చిల్లరడగడు' అనే క్యాప్షన్ చూస్తేనే ఈ సినిమా, నవ్వుల రసంతో సాగిపోతుందనే విషయం అర్థమవుతోంది. త్వరలోనే ఈ సినిమా రెగ్యులర్ షూటింగ్ కి వెళుతోంది. మిగతా వివరాలు త్వరలోనే తెలియజేయనున్నారు..