హైదరాబాదులో జిలేబీ దుకాణంలోకి దూసుకెళ్లిన కారు

హైదరాబాదులోని శంషాబాద్ లో రోడ్డు ప్రమాదం సంభవించింది. అత్యంత వేగంగా వచ్చిన ఓ కారు అదుపుతప్పి రోడ్డు పక్కన ఉన్న జిలేబీ తయారీ దుకాణంలోకి దూసుకెళ్లింది. ఈ కారును ఓ మహిళ డ్రైవ్ చేయడం గమనార్హం. ఈ ప్రమాదంలో షాపులో ఉన్న నలుగురికి తీవ్ర గాయాలయ్యాయి. వేడి నూనె మీద పడి వారు గాయపడ్డారు.

అప్పటి వరకు అక్కడ ప్రశాంతంగా ఉన్నవారు ఈ ఘటనతో ఉలిక్కి పడ్డారు. దుకాణం వైపు కారు దూసుకొస్తుండటాన్ని గమనించిన వారు పక్కకు పరుగులు తీశారు. బ్రేక్ ఫెయిల్ కావడం వల్లే ఈ ప్రమాదం జరిగిందని డ్రైవింగ్ చేసిన మహిళ తెలిపింది. ప్రమాదం జరిగిన తర్వాత స్థానికంగా ఉన్న ఎయిర్ పోర్ట్ పోలీస్ స్టేషన్ లో ఆమె లొంగిపోయింది. కేసు నమోదు చేసిన పోలీసులు కారును సీజ్ చేశారు. ప్రమాదానికి గల కారణాలపై దర్యాప్తు చేస్తున్నారు.