Andhra Pradesh: ఆ పేపర్ లో అన్నీ అసత్య వార్తలే..పేజీలకు పేజీలు రాస్తారు!: సీఎం చంద్రబాబు

వైసీపీ నేతలు తప్పుడు వ్యాఖ్యలు చేస్తారని, మైండ్ గేమ్ ఆడతారని ఏపీ సీఎం చంద్రబాబునాయుడు నిప్పులు చెరిగారు. నెల్లూరులో నిర్వహించిన సభలో ఆయన మాట్లాడుతూ, తమ ప్రభుత్వం ఇన్ని మంచి పనులు చేస్తుంటే, వచ్చే ఎన్నికల్లో వైసీపీ గెలుస్తుందని ఆ పార్టీ నాయకులు చెప్పుకుంటున్నారని విమర్శించారు. అలాంటి పనికిరాని పార్టీలను వచ్చే ఎన్నికల్లో చిత్తుచిత్తుగా ఓడించి బంగాళాఖాతంలో పడేయాల్సిన అవసరం ఉందని, ఆ విధంగా చేస్తేనే మన రాష్ట్ర అభివృద్ధికి అడ్డం ఉండదని వ్యాఖ్యానించారు.

ఓపక్క అనునిత్యం సమస్యలతో పోరాడాలి, మరోపక్క ఇలాంటి వాళ్లతో కూడా పోరాడాలంటూ వైసీపీ నేతలపై మండిపడ్డారు.   ఒక పేపర్ పెట్టుకున్నారని, ఆ పేపర్ లో అన్నీ అసత్య వార్తలేనని చంద్రబాబు ఆరోపించారు. ఆ వార్తలు చూస్తే మన మైండ్ కూడా పాడైపోతుందని, అసత్య వార్తలను ఆ పేపర్ లో పేజీలకు పేజీలు రాస్తారని దుయ్యబట్టారు. ‘మొన్నొక వార్త రాశారు. మా ఆడబిడ్డలకు ‘పసుపు-కుంకుమ’ కింద డబ్బులిస్తే, రుణం కింద ఇచ్చామంటూ రాశారంటే, వీళ్లకు బుద్ధి ఉందా? లేదా?’ అని చంద్రబాబు విరుచుకుపడ్డారు.