ఖరీదైన కారును గిఫ్ట్‌గా పొందిన 'ఆర్ ఎక్స్100' చిత్ర ద‌ర్శ‌కుడు

హీరోల క్రేజ్ ను పెంచడంలోను .. నిర్మాతలకి లాభాలను తెచ్చిపెట్టడంలోను దర్శకులదే ప్రధానమైన పాత్ర. అందుకే అటు నిర్మాతలు .. ఇటు హీరోలు కూడా దర్శకులకు ఎంతో ప్రాధాన్యతనిస్తూ వుంటారు. తమకి మంచి సినిమా చేసి పెట్టినందుకుగాను ఖరీదైన కానుకలను దర్శకులకు అందజేస్తూ తమ కృతజ్ఞతను చాటుకుంటూ వుంటారు. తమకి మంచి సక్సెస్ ను అందించినందుకు హీరోలు .. మంచి లాభాలు తెచ్చిపెట్టినందుకు నిర్మాతలు దర్శకులకు ఖరీదైన కారును కానుకగా ఇవ్వడమనేది ఇండస్ట్రీలో ఇటీవలి కాలంలో ఎక్కువగా కనిపిస్తోంది.

తమిళంలో అజిత్ .. సూర్య .. విజయ్ లు ఇలా కార్లను దర్శకులకు గిఫ్ట్ గా ఇస్తుంటారు. ఆ మధ్య 'శ్రీమంతుడు' హిట్ అయినప్పుడు మహేశ్ బాబు .. కొరటాలకి ఖరీదైన కారును గిఫ్టుగా ఇచ్చాడు. అలాగే 'ఆర్ ఎక్స్ 100' సినిమాతో భారీ లాభాలను తెచ్చిపెట్టిన దర్శకుడు అజయ్ భూపతికి .. నిర్మాత అశోక్ గుమ్మకొండ ఖరీదైన 'జీప్' కారును కానుకగా అందజేశారు. చాలా తక్కువ బడ్జెట్ తో తెరకెక్కిన ఈ సినిమా, కాసుల వర్షం కురిపించిన సంగతి తెలిసిందే.